Duha ka sakop sa Fernandez swindling group nasikop

CEBU, Philippines — Dugang biktima sa notorious nga Fernandez swindling group ang nipatim-aw diha sa buhatan sa kapolisan human nga duha ka sakop sa maong grupo ang nasikop diha sa Lungsod sa Catmon.

Si Police Lieutenant Colonel Randy Caballes, hepe sa Talisay City Police Station nagkanayon nga gikatakdang mopasaka sila og kasong swindling ug estafa karong adlawa batok nila ni Velbeth Fernandez ug Warren Fernandez.

Lakip sa pasakaan og samang kaso ang mga kauban sa duha nga sila si Dyna Tampus Fernandez, Christopher Ocañada ug Floreda Fernandez kinsa padayon pang gipangita.

Matud ni Caballes nga human masikop sila si Velbeth ug Warren dugang mga biktima gikan sa mga silingang lungsod ang nianha sa ilang buhatan.

Si Velbeth ug Warren nasikop kini atol sa hot pursuit operation sa kapolisan niadtong Biyernes Santo human ang ilang biktima ni-report diha sa police station.

Ang unang insidente sa pagpangilad nahitabo diha sa terminal sa Barangay Tabunok, Dakbayan sa Talisay niadtong Huwebes Santo ug ang ikaduhang insidente nahitabo sa samang adlaw sa laing lugar.

Gibutyag ni Caballes nga ang mga suspetsado niduol sa mga biktima kunohay nangita og ayohanan og sakyanan kay kuno naguba ang ilang sakyanan ug gipabantayan sa mga biktima ang maong naguba kuno nga sakyanan.

Ang mga suspetsado nidiskarte sa mga biktima nga ipabilin ang ilang mga cellphone gumikan kay pahuptan usab nila ang ilang kwarta sa dili pa sila mobiya apan ang mga mangingilad wala na nibalik ug ang kwarta nga ilang gibilin ngadto sa mga biktima budol money kini.

Nasayran sa kapolisan nga ang maong grupo notorious kini nga mga mangingilad kinsa si Velbeth pila ka higayon na kining nasikop.

Niadtong tuig 2016 si Velbeth nasikop kini ngadto sa Bukidnon , nasikop usab kini ngadto sa Roxas City ug niadtong tuig 2018 sa Dakbayan sa Mandaue ug sa samang tuig sa Isabela ug sa niaging tuig sa Lungsod sa Liloan.

Si Caballes nagkanayon usab nga sakop sa pamilya ang miyembro sa maong grupo kinsa si Victoria Fernandez nga igsuon ni Warren ang nagsugod niini. BDB (BANATNEWS)