CCTC nanuki-duki sa mga lugar nga nahimong tipik sa kasaysayan

CEBU, Philippines — Gibutyag ni Cebu City Councilor Jocelyn Pesquera kinsa mao usab ang naghupot sa Cebu City Tourism Commission nga nagsugod na og research ang iyang  buhatan kalabot sa mga lugar sa siyudad nga nahimong tipik sa kasaysayan atol sa panahon sa mga hapon.

Matud ni Pesquera nga kabahin na kini sa ilang preparasyon alang sa programa nila nga Japanese Heritage Tour.

Pipila sa mga lugar nga gidungog nga nahimong kampo sa mga Hapon kaniadto mao ang pipila ka mga dapit sa Barangay Babag ug Barangay Tagbao.

“Mag-research gyud ta og tarong niana kay kinahanglan nga makahatag ta og sakto  nga impormasyon alang sa mga mosalmot sa Japanese Heritage Tour”.

Gibutyag ni Pesquera nga suportado sa kagamhanan sa Japan ang tinguha sa CCTC.

Gawas sa Japanese Heritage Tour, tumong usab sa maong buhatan nga mo umol usab sa umaabot og American ug Chinese heritage tours.

Nasayran nga ang Japan anaa sa ikaupat nga “biggest tourism source market” sa wala pa ang pandemiya.

Niadtong tuig 2019, ang nasud nakatala og 682,788 ka turista gikan sa Japan.

Sukad sa subling pag-abli sa nasud sa mga kalihokan sa turismo niadtong buwan sa Pebrero niining tuiga ang Pilipinas nidawat na og 2,125 ka leisure travelers gikan sa Japan niadtong Marso 20, 2022. BDB (BANATNEWS)