Brownout, way signal gipangandaman na sa Comelec

CEBU, Philippines — Gihan-ay na karon sa Commission on Elections (Comelec) ang contingency plan alang sa umaabot sa May 9, local ug national elections hilabina may kalabotan sa supply sa kuryente ug signal sa mga polling centers sa tibuok probinsya.

Matud ni Atty. Jerome Brillantes, acting provincial election supervisor sa Sugbo nga nahinabi na niya ang Department of Energy (DOE) kalabot niini hilabina nga padayon pa ang recovery effort gikan sa pagkusokuso sa bagyong Odette niadtong Disyembre sa niaging tuig.

Hinuon dunay backup batteries ang mga vote counting machines kun mag brownout matud pang Brillantes.

“They assured me nga by coming election, ma fully energized na atong atong kuan (lugar). 90%  na ang accomplishment.. If ever wal silay kurente, kini atoang mga VCM naa siyay back up battery nga mo last three to four days,” matud ni Brillantes.

Kun walay signal sa usa ka polling center, ang mga electoral board mangita og paagi aron nga  ma transmit ang data o resulta gikan sa VCM o mas maayo moadto na lang sa munisipyo alang sa pag transmit sa resulta sa balota.

Ang Comelec padayong nagpahigayon og training sa mga magtutudlo nga moserbisyo sa electoral board sa umaabot nga eleksyon sugod pa niadtong Marso 1 hangtod Marso 21 karong tuiga.

“Specific instruction is how to operate the VCM and the contingency plan just in case naa tay technical problems nga mo come up sa election day,” matud ni Brillantes.

Apil usab sa training ang pag adopt sa new normal kon diin mag butang og mga personnel o medical team alang sa pag suta sa temperature sa mga botante pag adto nila sa mga polling places.

Kadtong tag-as og temperatura dunay gipalain nga lawak kun diin sila mobotar nga bantayan sab og mga sakop sa Department of Health sa matag polling centers. Sa laing bahin, gipasidan-an sa siyudad sa Sugbu ang mga kandidato kalabot sa Section 20 sa Comelec Resolution No. 1048 o pagdili og butang sa mga campaign materials sa mga poste, waiting sheds, ug uban pa nga government-owned properties ingon man sa mga punoan sa kahoy.

Ang mga tinugyanan sa Basura Clean Storm sa siyudad nagsugod na sa pagpanglangkat og mga election propaganda materials nga gipamilit sa mga ginadili nga lugar.— Sanden J. Anadia/IBM (BANATNEWS)