Mga BIC sa Cebu City isirado sulod niining buwana
CEBU, Philippines — Sulod niining buwana isirado na ang tanang Barangay Isolation Centers sa Siyudad sa Sugbo matud ni Cebu City Councilor Joel Garganera, pangulo sa Emergency Operations Center Cebu City.
Ang Cebu City adunay siyam ka BIC nga giandam apan tulo lang niini ang operational kinsa ang mga asymptomatic nga pasyente sa COVID-19 anha ibutang.
Ang mga BIC nga operational gilangkuban sa Labangon, Zapatera ug City Central School diin diha dad-on ang mga mabdos nga mga COVID-19 patients.
Ug gumikan niini nihangyo si Garganera nga hatagan sila kutob niining buwana aron mahawanan ug mabalhin ang gamit diha sa maong tunghaan ngadto sa Cebu City Medical Center ug ang EOC maoy mohatag sa personnel sama sa doctor, midwife ug uban pa.
Sayo pa, ang Commission on Election (Comelec) Cebu City nagpadala og suwat nga naghangyo sa kagamhanan sa Siyudad sa Sugbo nga bakantehan na ang mga tunghaan nga gihimong BIC tungod kay gamiton nila kini sa umaabot nga May 9, 2022 national ug local elections.
Matud ni Garganera nga ang COVID-19 patients adto na dad-on sa Moses Quarantine Center diha sa North Reclamation Area.
Ibutang sa EOC sa warehouse ang mga katri nga anaa sa mga BIC aron kon ugaling mosaka pag-usab ang kaso sa COVID-19 sa Cebu City adunay magamit.
Adunay giandam nga contingency plan ang EOC Cebu City kon ugaling mosaka pag-usab ang COVID-19 sa siyudad. —BDB (BANATNEWS)
- Latest
