Cebu City nakakuha og dugang pundo alang sa flood control projects

CEBU, Philippines — Nakakuha og dugang pundo ang Dakbayan sa Sugbo gikan sa Department of Public Works and Highways alang sa pagkompleto sa pipila ka flood control projects sa siyudad.

Si Konsehal Jerry Guardo, chairman sa committee on infrastructure sa konseho sa siyudad nanghinaot  nga mo kooperar ang katawhan nga molabay og basura sa hustong paagi. Bag-o lang, pipila ka mga residente sa Barangay Day-as ang nireklamo ug nangayo og tabang kang Guardo human makasinati og baha diha sa ilang lugar.

Si Guardo nasurpresa kini tungod kay kay ila nang gilimpiyohan ang mga agianan sa tubig diha sa lugar ug nahibaw-an na lang nga adunay mga punoan sa kahoy ug mga basura ang natanggong ilawom sa taytayan sa maong dapit.

Matud ni Guardo nga nagkinahanglan ang maong dapit og pagpalapad ug pagpalawom sa sapa diha sa T.Padilla.

Gibutyag ni Guardo nga anaa na ang pundo alang niini ug mopahigayon na ang DPWH alang sa bidding sa maong proyekto.

Gawas niini, gipaabot usab nga mahuman ang flood control project diha sa Barangay Tejero nga adunay P100 milyones nga pundo sa habig sa Barangay Tinago ug laing P100 milyones sa habig sa Barangay Zapatera.

Ang mga apektadong estraktura sa sapa sa Barangay Zapatera mahimong makapahimulos sa medium-rise building sa Siyudad isip relokasyon.

Kapin sa 30 ka structure owners ang maapektohan sa palibot sa BarangayLorega samtang ang usa sa Day-as padayon pang gisusi.

Ang nahabilin nga pundo sa Tejero project gamiton alang sa laing proyekto sa likod nga bahin sa merkado publiko sa T. Padilla. Sanden J. Anadia/BDB (BANATNEWS)