Scholarship program sa Liloan usa sa kinadak-an tibuok Pilipinas

CEBU, Philippines — Bisan og usa lamang ka munisipalidad, apan ang Lungsod sa Liloan maoy dunay kinadaghanang iskolar nga gipatungha sa tibuok Pilipinas sumala pa ni Liloan Mayor Christina Garcia Frasco.

Ang lungsod duna karoy 7,528 scholars nga gipaabot nga makaangkon og maayong kaugmaon pinaagi sa edukasyon nga gidalit sa lungsod.

Matud pang Mayor Frasco, nakompleto na paghatag sa lungsod sang scholarship grants sa tanang kasamtangan ug mga bag-ong iskolar sa lungsod.

Pinaagi sa 7,528 scholars, ang Liloan usa na karon dunay kinadaghanan og scholarship programs sa nasud.

Daan nga giingon ni Frasco nga ang edukasyon maoy numero uno nilang prayoridad tungod kay gipangandoy nilang makabaton ang Liloan og mga highly educated ug skilled nga populasyon nga may kapabilidad nga mokita og makaangkon og haruhay nga kinabuhi.

“Let no pandemic, typhoon, or any other hardship stand in your way or deter you from your dreams. Continue to work hard and persevere. We are here to help in your education, and together we shall prevail!” matud sa mayor.

Ang programa gipasiugdahan kaniadto sa iyang bana nga si Congressman Duke Frasco sa dihang kini pa maoy mayor sa lungsod sud sa siyam ka tuig.

Karon nga si Mayor Christina na maoy milingkod, gipalapdan pa niya kini dihang sa unang termino niya sa tuig 2016 nagdugang kini og dos mil ka scholars.

Tungod sa pagpalapad sa programa duna na sab kini scholars alang sa graduate studies sama sa law school, masteral studies, ug scholarship para sa mga varsity athletes.

Sa pagtutok sa administrasyon ni Frasco sa edukasyon, ang lungsod gipasidunggan isip Top Philippine Model Municipality Education Hub Award in 2019.—IBM (BANATNEWS)