Minor de edad ug kolektor nasikop sa buybust

CEBU, Philippines — Nasikop sa gipahigayon nga buybust operation sa City Intelligence Unit sa Cebu City Police Office ang us aka menor de edad nga lalaki u gang giingong kolektor sa halin sa ilegal nga drugas diha sa Atillo St. sa Brgy. Punta Prinsesa sa Dakbayan sa Sugbo.

Ang operasyon pinangulohan ni Police Lieutenant Colonel Randy Caballes  nga niresulta sa pagkasikop sa 17-anyos nga giingong namaligya og ilegal nga drugas ug ang tigkolekta sa mga halin sa ilegal nga drugas nga si Reggie Sangcadan Santos, 30.

Matud pa ni Caballes nga usa ka simana nilang gi monitor ang kalihokan sa 17 anyos kinsa maoy target sa maong operasyon hasta ang pirme niining kuyog-kuyog nga si Santos.

Si Caballes miingon nga makabaliya og usa ka kilong shabu matag semana ang maong menor de edad. Nasayran sab nila nga uyoan sa maong batan-on nga giila lang sa pangalang “Junjun” ang tigsuplay kaniya sa maong ilegal nga drugas.

Ang batan-on nitug-an sa mga operatiba nga sugoon kini sa iyang uyoan isip tighatud sa shabu kun dunay mopalit ug suholan siya og P1,000.

Atol sa maong operasyon nakuha gikan sa duha ang 255 gramos nga gituohang shabu nga mobalor og kapin sa P1.7 milyon. Kasong kalapasan sa Sec. 5 og Sec 11 ART ll RA 9165 ang atubangon sa duha.— IBM (BANATNEWS)