Rambol nahitabo sa tigbakayan,1 naangol
CEBU, Philippines — Usa ka tawo ang grabeng naangol atol sa karambola sa tigbakay diha sa Purok 1, Barangay Tunghaan, lungsod sa Minglanilla niadtong Domingo sa hapon.
Ang biktima mao si Allan Cañoneo Raplaya, 28 anyos, ulitawo nga nagpuyo sa maong dapit. Si Police Senior Master Sergeant Junyl Ater nibutyag nga daghan ang diha sa lugar aron manugal.
Apan nagsugod ang kagubot sa dihang nag-abot ang manok nila ni Christopher Hervela Bacalso, 42 anyos ug ni Constancio Cañoneo Unabia, 41 anyos.
Samtang naglinabukay ang mga manok, kalit nga gikuha ni Bacalso ang iyang manok ug nasuko si Unabia kay matud pa dumadaog ang iyang manok.
Iyang gihagad og sinukmagay si Bacalso hangtud nagsugod na ang karambola.
Si Raplaya maoy nagrabehan human maka-angkon og kadaut sa iyang ulo hinungdan nga gidali kini pagdala sa tambalanan.
Sa imbestigasyon sa kapolisan, walay bisan usa ang niangkon sa pagkabun-og ni Raplaya hinungdan nga gidakop ang tanan nga niapil sa kasamok.
Ang mga dinakpan mao sila si Michael Cañoneo Rapayla, 34 anyos; Joel Heruela Bacalso, 47 anyos; Jorge Caparas Cañoneo, 21 anyos; Jerson Ababon Bacalso, 19 anyos; Constancio Cañoneo Unabia, 41 anyos; Chritopher Hervela Bacalso, 42 anyos; Joel Jr. Ababon Bacalso, 21 anyos; Antonio Traña Olanda Jr. 29 anyos; Jerry Jemenia Cañoneo, 28 anyos ug si Edgar Heruela Bacalso, 45 anyos.
Ang mga nirespondeng polis nga sila si PCMS Joel Lacson; PCPL Ferrante Ygot ug si PSSG Retchel Antipuesto nidesisyon nga dakpon silang tanan gumikan kay silang tanan ang nakahimo sa kasamok. —MEL (BANATNEWS)
- Latest
