Drayber ug konduktor nihangyo nga lugwayan ang pag-require sa air purifier

CEBU, Philippines — Ang pipila ka drayber ug konduktor sa Cebu South Bus Terminal niawhag ngadto sa Probinsiya sa Sugbo ug kapolisan nga hatagan sila og lugway nga makapalit og air purifier nga gi-require karon sa probinsiya.

Nahisgutang mga drayber ug konduktor sa bus ug mini bus nagkanayon nga kinahanglan gyud sila nga mosunod sa protocol nga giluwatan sa Kapitolyo apan dili ang tanan ang nakapalit.

Hinundan nga ang pipila sa mga sa bus sa habagatan nga bahin sa probinsiya ang wala mobiyahe tungod kay nahadlok nga dakpon sa polis ug multahan.

Si Romulo Alcordo, drayber sa SEPO mini bus nagkanayon nga siya ug ang iyang mga kauban wala pay ikapalit og air purifier.

Apan bisan pa og wala pa siya’y air purifier nisuway lang gihapon siya og biyahe aron motabang sa tag-iya sa bus sa pagpangita og air purifier nga mapalit apan walay  mapalit diha sa mga tindahan bisan sa online shop.

Matud ni Alcordo nga nabantayan niya nga daghan kaayong pasahero ang nag-atang diha daplin sa karsada sa tungod kay ang ubang mga bus wala mopadayon og biyahe tungod kay nahadlok nga dakpon.

Si Alcordo niawhag sa otoridad nga dili unta sila dali-dalion tungod kay dili dayon mapalit ang air purifier.

Si Gobernador Gwendolyn Garcia nihatag kini og lugway hangtud sa Agosto 25, 2021 ang pag-require sa air purifiers sa mga drayber ug konduktor.

Ang ubang bus companies sa CSBT nakahatag na hinuon og air purifier sa ilang mga drayber ug konduktor diin uban niini libre apan adunay gipadata-datahan ug adunay tibuok nga kantidad ang pagpabayad.

Si Garcia niluwat og memorandum nga nag-require sa mga drayber ug konduktor sa mga Public Utlity Vehicle (PUVs) nga magsul-ob og air purifier sukad kagahapon.

Samtang ang Department of Health wala morekomendar sa paggamit sa air purifier.

Matud ni Health Undersecretary Ma. Rosario Vergerie nga hinuon dili makapapeligro

ang paggamit niini apan dili kini makahatag sa proteksiyon batok sa COVID-19 hilabina nga walay ebidensiya nga nag suporta niini. BDB (BANATNEWS)