45 ka sakyanan gi-clamp sa CCTO tungod sa illegal parking

CEBU, Philippines — Niabot sa 45 ka mga sakyanan ang na-clamp sa Cebu City Transportation Office (CCTO) atol sa ilang gipahigayong operasyon labot sa night parking kagahapon.

Hugot nga gipatuman sa CCTO ang City Ordinance No. 2004 diin pito ka Barangay ang ilang gi-adto nga miresulta nga daghang sakyanan ang na-clamp.

Ang mga barangay nga gisuroy sa mga personnel sa CCTO mao ang Mactan Street ug San Roque sa Barangay Hipodromo; Clavano ug Juana Osmeña Extension sa Barangay Capitol Site; Purok 9 ug Martinez compound sa Barangay Kamputhaw ug Bo. Luz.

Giadto sab sa CCTO ang Tres Borces, Juaquino, New Era ug Persimmon sa Barangay Mabolo; Sunset Drive, Salinas Drive ug Edison Street sa Barangay Lahug ug ingon man diha sa Barangay Apas.

Giawhag sa Cebu City Transportation Office ang mga tag-iya sa sakyanan nga na-clamp sa pag-settle sa ilang obligasyon ngadto sa buhatan sa CCTO.

Nahimutang kini sa 2nd floor sa Ramos Public Market gikan sa alas 8 sa buntag hantod sa alas 5 sa hapon aron dili kini maguroy kun molapas na sa 24 oras ng dili pa gihapon ma-settle.— MEL (BANATNEWS)