CT-TODA miawhag sa mga bikers nga magbutang og reflectors

CEBU, Philippines — Mitambag ang pangu sa City of Talisay-Traffic Operation Development Authority (CT-TODA) Jonathan Tumulak ngadto sa mga bikers nga magbutang gyud og reflectors sa ilang bisiklita.

Kini aron dali nga mabantayan sa ubang motorista nga naa sab nagbiyahe sa karsada ug malikayan ang aksidente.

Si Jonathan Tumulak niingon nga malikayan pa unta ang aksidente nga nahitabo sa Barangay Dumlog niadtong miaging kadlawon kun nabantayan pa sa driver sa auto nga dunay biseklita sa iyang atubangan.

Sa nasayran namatay ang usa ka 19 anyos nga siklista nga naila nga si Junmery Rodriguez human nadaro sa auto tungod kay wa mabantayi sa driver.

Si Tumulak nitataw nga ang pag gamit sa bisiklita angay nga saktohon kini sa kagamitan ilabi na panahon sa kagabhion.

Iya sab nga gihangyo ang mga motorista nga magpahinay lang sa pagpadagan tungod kay maabot ra man gyud kini sa padulngan.  — /MEL (BANAT NEWS)