Konseho sa Cebu City dili uyon sa cash incentives sa mga kawani

CEBU, Philippines — Girespeto ni Mayor Edgardo Labella  ang desisyon sa mga konsehal nga dili uyon  sa paghatag og cash incentives sa mga kawani sa city hall  nga magsilbing charter day bonus.

Pipila ka mga sakop sa konseho ang nipadayag nga dili haom ang pagpanghatag og bonus tungod kay nagsagubang pa ang katawhan sa pandemiya.

Apan matud ni Labella nga dili usab lalim ang trabaho sa city hall employees tungod kay expose sila sa daghang tawo ilabi na kadtong in-charge sa pagkolekta og payments.

Ug gani aduna nay namatay nga mga empleyado tungod sa COVID-19.

Sayo pa, ang Program on Awards and Incentives for Service Excellence (PRAISE) niumol na kini og rekomendasyon nga maghatag og P10,000 nga charter day cash incentives alang sa mga empleyado .

Sa laing bahin, gitataw sa kagamhanan sa Dakbayan sa Sugbo nga kaalyado o dili  sa politika makadawat gyud ang tanang barangay  og financial subsidy alang sa ilang mga proyekto .

Sayo pa, gikataho nga ang siyudad nag-andam kini og P600 milyones ug ang maong kantidad bahinon kini ngadto sa 80 ka barangay isip financial subsidy alang sa nagkadaiyang proyekto.

Ang matag barangay kinahanglang mo presentar og Program of Works and Estimates (POWE) sa ilang project proposals ug liquidation sa nangagi nga financial subsidy sa siyudad nga ilang nadawat.

Samtang ang Department of Social Welfare and Development-7 niluwat kini og P13 milyones nga Livelihood Assistance Grant pinaagi sa Sustainable Livelihood Program ngadto sa 1,360 ka beneficiaries sa Lungsod sa Tuburan, Balamban ug Austurias

Ang direktor sa DSWD-7 Rebecca Geamala niawhag sa beneficiaries nga gamiton ang ilang grant nga nadawat gikan sa gobiyerno sa purposed niini.

Matag beneficiary makadawat og P10mil nga start-up aron maka-recover sa epekto sa COVID-19 pandemic sa panginabuhian sa pamilya.

Ang LAG kabahin kini sa recovery and rehabilitation program ubos sa Bayanihan 2 Social Amelioration Program. — Rowena D. Capistrano/BDB (BANATNEWS)