Kanhi mayor sa Dumanjug Nelson Garcia nitaliwan

CEBU, Philippines — Nitaliwan na ngadto sa laing kalibutan ang kanhi mayor sa Lungsod sa Dumanjug nga si Nelson Garcia.

Kini ang gikompirmar sa iyang igsuon nga si Atty. Winston Garcia pinaagi sa facebook page niini.

“To my dearly beloved brother, words cannot express the deep sense of loss and grief for your untimely departure”, tipik sa post ni Winston sa iyang facebook page kagahapon.

Sa oras sa pagsulat niining balita, ang pamilyang Garcia wala pa kini moluwat og opisyal nga pamahayag ug wala pa usab gibutyag ang hinungdan sa kamatayon  ni Nelson.

Si Nelson kinsa nagpangedaron og 61-anyos usa kini sa mga igsuon ni Gobernador Gwendolyn Garcia ug ika-upat siya nga anak ni kanhi gobernador Pablo “Pabling” Garcia ug kanhi Judge Esperanza “Inday” Fiel Garcia.

“YoYoi were always the son, the brother, the husband and the father I wish and have always aspired to be”, dugang ni Winston.

Ang public information office sa Probinsiya sa Sugbo nikompirmar usab sa kamatayon ni Nelson.

“He served the people of Dumanjug, Cebu, with devotion, as their mayor for two terms. He served the Province of Cebu with dedication as President of the League of Municipalities of the Philippines - Cebu Chapter”, tipik sa facebook post sa Sugbo News.

Si Nelson napili kining mayor sa Lungsod sa Dumanjug niadtong tuig 2010 hangtud sa 2016. /BDB (BANATNEWS)