Blood donation giduso sa konseho sa siyudad

CEBU, Philippines — Giawhag sa konseho sa Dakbayan sa Sugbo ang City Health Office uban ang Association of Barangay Councils ug pribado nga sektor sa pagsabwag sa kamahinungdanon sa pagdonar og dugo.

Kini makatabang aron maseguro ang kalidad, luwas ug igo nga suplay sa dugo ug blood products alang sa epektibo nga paghatud sa serbisyo sa panglawas taliwala sa pandemya sa coronavirus.

Gihangyo sab sa konseho ang Human Resource Development Office nga himoong regular activity ang voluntary blood donation ug awhagon ang tanang empleyado nga modonar og dugo ug motabang sa pagluwas og kinabuhi.

Si Konsehal Alvin Dizon ang niduso sa resolusyon alang sa maong hangyo.

Matud sa konsehal nga ang pagdonar og dugo napamatud-an usab nga adunay benepisyo sa panglawas ug pagkunhod sa risgo sa kanser ug hemochromatosis, pagkunhod sa peligro sa kadaut sa atay ug dila-dila niini, ug makatabang sa pagpauswag sa kahimsog sa cardiovascular health ug pagminus sa obesity.

Sumala pa ni Dizon nga ang pagsabwag sa voluntary blood donation naghatag og gibug-aton sa kamahinungdanon sa tahas sa blood donors aron makab-ot ang katuyoan sa universal health coverage. /GMR (BANATNEWS)