Pagpasul-ob og mask gihigpitan sa Consolacion

CEBU, Philippines — Dakpon ug makabayad og multa kadtong mogawas sa ilang panimalay nga dili magsul-ob og face mask sa Lungsod sa Consolacion.

Kini base sa gipalabang sa konseho nga ordinansa nga giaprobahan ni Mayor Joannes Alegado.

Ang istrikto nga pagpatuman sa pagsul-ob og face mask sa mga molupyo sa kabarangayan sa Lungsod sa Consolacion maoy kabahin sa gihingusgan nilang pamaagi nga health protocol sa paglikay sa pagkatap sa coronavirus disease 2019.

Nunot sa higpit nga pagpasul-ob og face mask sa mga molupyo, ang mga mall, kan-anan ug uban pa nga mga buhatan ang giawhag usab nga dili mopasulod sa walay face mask nga mga kustomer.

Base sa maong ordinansa ang madakpan nga makahimo og kalapasan ang makabayad og multa nga P500 o pagkabilanggo og lima ka adlaw alang sa unang kalapasan.

Sa ikaduha nga kalapasan maoy ipahamtang ang P1,000 nga multa o napulo ka adlaw nga pagkabalhug sa bilanggoan.

Ang kapolisan ug ang mga opisyal sa barangay maoy gitahasan nga mopatuman sa ordinansa nga naghigpit sa mga molupyo sa pagsul-ob og face mask sa ilang paggawas gikan sa ilang panimalay. /GMR (BANATNEWS)