Mga pasyente sa VSMMC dili na pabantayan

CEBU, Philippines — Giatiman sa kagamhanan sa Siyudad sa Sugbo ang kabanay sa mga pasyente nga na-admit sa Vicente Sotto Memorial Medical Center nga gipagawas human gipatuman ang “No Watchers Policy”.

Tuyo niini nga malimitahan ang mga tawo sulod sa hospital, ma-obserbar ang social distancing ug malikayan ang posibleng pagtakod sa coronavirus disease.

Matud ni Ranilo Agarao, administrative officer sa Department of Social Welfare and Services sa siyudad, nga kadaghanan sa mga gipahiluna sa Fuente Osmeña Circle dili taga Cebu City.

Mga residente ang uban sa nagkalain-laing bahin sa Probinsiya sa Sugbo nga wala’y kapuy-an ug wala’y kasakyan pauli sa ila ilabi na nga karon nga gipaubos pa sa modified enhanced community quarantine ang siyudad.

Gihatagan sab sa siyudad og pagkaon ug tubig ang mga nahisgutan ug ang tulda nga gimontar sulod sa Fuente Osmeña Circle gibutangan og trapal aron makahigda ug dili mabasa sa uwan.

Ang mga hingtungdan wala kauyon sa polisiya sa tambalanan gumikay kay layo sila sa pasyente ug nabalaka nga mas expose sila sa COVID-19 tungod kay daghan sila magtapok sa lugar nga wala magkailhanay.

Alang kanila mas luwas sila sulod sa tambalanan ug duol ra sab sila sa ilang gibantayan nga pasyente. /GMR (BANATNEWS)