Naka-recover nga pasyenteng nagpabilin sa BIC gipapauli

CEBU, Philippines — Mga pasyenteng nangaayo na gikan sa novel coronavirus disease (COVID-19) nga nagpabilin sa barangay isolation center diha sa Barangay Luz sa Dakbayan sa Sugbo gimandoan nga pagawson na bisan dili pa sila gustong mogawas.

Ang tigpamaba sa mga pasyente sa BIC sa maong barangay nga si Roy Genares kauban ang laing napulo sab ka nangaayo na nga pasyenteng gustong magpabilin gihapon sa BIC gimandoan na sa pagbiya sa lugar ug gipapauli sa ilang tagsa-tagsa ka mga panimalay.

Ang maong grupo gitugotan sa ilang barangay sa ilang hangyo nga magpabilin sa BIC aron atimanon ang ilang mga kabanay nga mga edaran ug mga menor de edad nga pabiling gikwarantina ug nagpaabot pa sa resulta sa re-test sa COVID-19.

Sumala pa nga gipadad-an og suwat si Genares nga nagmando kaniya ug sa iyang mga kaubanang naka-recover na sa pagbiya sa BIC sud sa duha ka adlaw.

“If you fail to vacate within the period, you will be arrested and charged for a criminal offense,” bahad pa sa maong suwat nga matud pa gipirmahan ni PNP Police Station 4 chief, Police Major Dindo Juanito Balili Alaras.

Apan ang nakapahibulong sa maong suwat, wala kini matud pa official logo sa PNP ug address sa police station mao nga nagduda silang Genares kun unsa kini ka tinuod.

Gisuwayan pagkuha og pamahayag si Alaras apan dili kini makontak.

Sa linaing interbyu kang sa The Freeman, igsuong pamantalaan sa Banat News, gikwestyon sab niya ang timing sa paghatud sa maong suwat.

Matud pa naabot kini kaniya usa ka adlaw human siya na-interbyu sa media diin iyang gitug-anan bahin sa sitwasyon sa sud sa BIC ug sa uban pang sensitibong isyu bahin sa mga resulta sa re-test  unang batch sa mga pasyenteng nabiyaan.

Matud ni Genares nananghid sila sa barangay officials nga magpabilin didto sa BIC tungod kay way health workers nga nag-istar didto aron maatiman ang 15 ka senior citizens gikan sa unang batch ug laing lima sa ikatulong batch.

Gawas sa mga edaran, naa pay usa bata nga naa didto nga nagkinahanglan sa pagamuma sa inahan.

Ang kagawad sa Bo.Luz nga si Maynard Salinguhay mikompirmar nga nananghid ug ilang gitugotan ang grupo ni Genares kay nagtuo silang dali ra mogawas ang resulta sama sa rapid testing.

Sa pagkakaron, ang nahibilin sa unang batch naa na sa ika-42 ka adlaw sa maong BIC. Dihang natapos ang 14- adlaw nga quarantine period, ang 24 sa unang batch  pabilin gihapong positibo sa virus maong gipapadayon ilang kwarantina.

Niadtong Mayo 18 gihimo ang ikaduhang test sa ikaduhang batch, rapid ug swab tess ang gihimo. Paglabay sa pipila ka adlaw, nigawas na ang swab results, apan  wala pa gihapon mogawas ang nahibilin sa unang batch sa ilang re-test hangtud karon.

Samtang nagpaabot sa resulta, kadtong mga negatibo na nga mga pasyene gibutang una sa “transition room” aron di sila matakdan og balik sa mga bag-ong batch sa mga asymptomatic Covid 19 positive.

Matud ni Salinguhay makigkita pa siya ni Genares aron estoryahan ang ilang apelar. Hinuon mipadayag ng daan si Genares nga di nila supakon kun unsay mando, apan kinahanglang siguraduhong maatiman ang nahibiling mga pasyente nga ilang giatiman. /IBM (BANATNEWS)