Namaligya og tambal, thermal scanner sikop

CEBU, Philippines — Duha ang nadakpan human nasakpan nga namaligya og gituohan nga peke nga mga tambal sa Barangay Bacayan, Dakbayan sa Sugbo.

Giila ang mga dinakpan nga sila si Roel Noynay, 20-anyos nga taga Barangay San Isidro, Dakbayan sa Masbate ug James Bulat-ag, 22-anyos nga taga Barangay San Jose, Dakbayan sa Sugbo.

Matud ni Police Captain Jonathan Taneo nga gisita lang nila ang duha nga naglakaw samtang nagpatrolya ang kapolisan.

Dugang pa ni Taneo nga nitug-an ang mga suspek nga namaligya kini og tambal sa mga balay-balay ug ang mga tambal nga ilang gipamaligya napalit lang sab kini sa usa ka botika.

Apan sa pagsusi sa director sa Cebu City Police Office nga si Police Colonel Josefino Ligan nga sa sulod sa kahon sa mga tambal nasayaran nga peke kini gumikan kay lahi kini og dagway sa naandan nga tambal nga sarang mapalit karon sa lehitimo nga botika ug ginadili sab ang pamaligya pinaagi sa balay-balay.

Matud ni Ligan nga ipasusi sab nila pag-usab sa Food and Drug Administration ang mga tambal aron masuta kun original o fake ba ang mga tambal.

Sa laing bahin 85 ka thermal scanner ang nakuha sa gipahigayon nga entrapment operation sa Regional Special Operation Group (RSOG) sa Barangay Capitol Site, Dakbayan sa Sugbo.

Giila ang mga dinakpan nga sila si Louisa Ann Guy, 21-anyos ug Donna Guy, 43-anyos nga pulos taga Barangay Quiot, Dakbayan sa Sugbo.

Ang duha giingon nga mga online sellers ug gikatransaksyon sa kapolisan.

Gibaligya ang mga thermal scanner sa presyo nga P4,500 diin mahal kini sa regular nga presyo nga P3,500. /GMR (BANATNEWS)