Chan nagtinguha pagbutang og satellite market

CEBU, Philippines — Gitinguha ni Mayor Junard Ahong Chan sa Dakbayan sa Lapu-Lapu ang pagbutang og temporaryong satellite market diha sa mga barangay ug subdivision sa siyudad taliwala sa gipatuman nga enhanced community quarantine.

Matud ni Chan nga bisan sa higpit nga gipatuman nga ECQ adunay pipila ka mga molupyo gikan sa kabarangayan ang padayon sa ilang pag-adto sa merkado publiko aron makapalit sa matag adlaw nilang panginahanglan.

Giingong gikinahanglang magbutang og temporaryong satellite market isip paagi nga dili na mapugos sa pag-adto sa merkado publiko ang mga molupyo.

“Gi-encourage nako nga kong mahimo ang matag subdivision o barangay magmugna usab og ilang temporary satellite market aron dili na mogawas o molakaw og laing lugar ang atong mga kaigsuonan aron mamalit”, matud ni Chan sa post niini sa iyang facebook page.

Nunot niini, si Chan nagkanayon nga tinguha karon niya ang pagpahiluna og mobile market o rolling store sa dakbayan tungod kay sa maong paagi ka menosan usab ang gidaghanon sa mga tawo nga mamalit diha sa merkado publiko niining panahon nga nagpadayon ang ECQ.

“Ang atong merkado publiko congested kaayo. Gusto ko nga mabahin-bahin kini mao nga magmugna kita og rolling store o mobile market”, dugang ni Chan.

Wala malakbiti sa paghisgot ni Chan sa iyang post sa ang mga pamaagi sa ipahiluna nga mobile markets sa higayon nga mahimo na unya kining operational. /BDB (BANATNEWS)