Luna gitukuran sa laing tawo

CEBU, Philippines – Nangayo og tabang ang tag-iya sa pribadong luna sa Office of the Building Official sa pagbadlong sa ilegal nga gipangtukod sa lugar sa may Sitio Mansinitas, Inayawan, Dakbayan sa Sugbo.

Si Joerengil Palomares nisumbong kang Architect Florante Catalan, hepe sa OBO, labot sa ilegal nga pagtukod ni Harry Eran sa usa ka koral sa ilang luna.

Matud ni Palomares nga gawas sa koral, gisugdan na sab ni Eran ang pagtukod og konkreto nga building.

Matud ni Catalan nga ang OBO nagpadala na og inspection team sa maong lugar aron susihon ang kahimtang ug magkuha og impormasyon gikan sa mga kasikbit nga residente.

Human niini hayan morekomendar ang OBO sa pagsang-at og ejectment.

Sumala pa ni Palomares nga nisang-at na sila og ejectment case batok ni Eran ug Anabelle Wenceslao sa buhatan sa barangay kapitan apan hangtud karon wala pa napatawag ang duha.

«Nagbayad na gyud mi sa OBO, sa City Planning, duna nay approved, so sila na ang mo-action ani,» matud ni Palomares. /GMR (BANAT NEWS)