Pipila ka mga dapit sa Metro Cebu gibaha

CEBU, Philippines – Pipila ka mga lugar sa Metro Cebu gibahaan tungod sa tibuok adlaw nga pagbunok   sa uwan kagahapong adlawa nga nakapabara sa mga trapiko sa nagkalain-laing mga dalan.

Sa Mandaue City hinay kaayo ang pagirog sa trapiko tungod sa kataas sa tubig sa pipila ka mga dalan niini.

Naglakip sa mga dalan nga nakasinati og mga pagbaha  mao ang  dalan sa A.C.  Cortes  Avenue nga nahmitang sa ubos nga bahin  sa Old Mactan Mandaue Bridge,  Ouano  Avenue ug uban pa.

Dugang  nakatambo sa panaghuot  sa mga sakyanan mao  ang pagkayabo  sa gikarga nga botelya sa softdrink nga mibabag sa north road lane sa habig sa Lungsod  sa Consolacion.

Sumala pa sa Philippine Atmospheric Geophysical and Astronomical Services Administration (Pagasa – Mactan) ang pagbunok sa ulan kagahapong adlawa epekto sa low pressure area (LPA) 705 kilometros  sa Davao. “Based on our forecast, the rains we’re experiencing right now will last throughout the day. We will be experiencing light to occasional heavy rains,” pagpasabot pa ni  Angelica Orongan nga maoy  weather specialist  sa Pagasa-Mactan.

Gipaabot hinuon nga arang-arang ang panahon sa Sugbo karong adlawa.

“This is because the LPA, based on our current models, will likely dissipate in the next few hours. We can expect the rains to subside by Thursday evening,”dugang pa ni Orongan.

Samtang sa Dakbayan sa Talisay, tungod sa way hunong nga pag-uwan gialerto ni Alvin Santillana, pangu sa City Disaster Risk Reduction and Management Office (CDRRMO) ang mga sakop aron makaresponde dayon kun dunay dili maayong mahitabo.

Partikular sa ilang gialerto mao ang mga residente sa mga bukirang barangay ug mga nagpuyo sa daplin sa mga sapa nunot sa paghumok sa yuta ug pagsuyla sa tubig bunga sa pagbaha. Gabriel Bonjoc/IBM (BANAT NEWS)