Mayor Reluya modangop sa Camp Crame alang sa hustisya

CEBU, Philippines — Mobisita pagbalik si Mayor Lakambini “Neneth” Reluya sa Lungsod sa San Fernando ngadto sa kapolisan aron mangayo sa kaugmaran kabahin sa kaso sa pagpatay sa iyang bana ug mga kauban sa trabaho.

Si Mayor Reluya uban sa iyang bana kaniadto nga si Ricardo “Nonoy” Reluya kauban nila ni Ricky Monterona ug Allan Bayot sakay sa puti nga van paingon sa Siyudad sa Sugbo.

Niadtong higayona pag-abot nila diha sa Barangay Lawaan 1, Dakbayan sa Talisay gipauwanan sila og mga bala sa wala mailhing mga criminal kinsa sakay sa SUV ug patay diha-diha ang tulo samtang si Mayor Reluya ang naluwas.

Hangtud karon wala pay nadawat nga kasayoran ang kampo ni Reluya kabahin sa motibo sa pagpatay ug sa mga kriminal. Si Reluya nagplano kining mobisita diha sa Police Regional Office (PRO)-7 aron mangamusta sa kaugmaran sa kaso.

Gawas niini, nagplano si Mayor Reluya nga ipaabot ngadto sa Camp Crame ang maong kaso aron mahatagan og hustisya ang kamatayon sa mga biktima.

Niadtong Miyerkules sa hapon gihimo ang Santos nga Misa sa paghandum sa kasumaran sa kamatayon sa mga biktima diha sa San Isidro Labrador Parish sa Barangay South Poblacion, Lungsod sa San Fernando.

Human sa Santos nga Misa nagdagkot sila og mga kandila nga giporma og “JUSTICE”. /BDB (BANATNEWS)