Mga bisyoso nga polis gikasohan
CEBU, Philippines – Mokabat sa 14 ka polis sa Police Regional Office 7 ang nag-atubang og kasong administratiba sa kalapasan sa kamandoan ni Presidente Rodrigo Duterte.
Ang Integrity Monitoring Enforcement Group (IMEG) Visayas Field Unit ang gitahasan sa Philippine National Police (PNP) sa pag-monitor sa mga badlongon nga polis.
Kini sama sa mga polis nga mag-inom sa pangpublikong lugar, mag-party sa mga bars, manugal sa mga buwangan, mosulod sa mga casino ug uban pa nga matang sa bisyo nga gipalikayan sa Presidente nga gi-monitor sa IMEG Field Unit.
Matud ni Police Captain Neon Francis Alvarez, provincial officer sa IMEG Visayas Field Unit, nga ang 14 ka polis nga nag-atubang og kasong administratiba mga nakuhaan og hulagway ug video nga nisupak sa kamandoan sa Presidente.
Dugang ni Alvarez nga subay sa mando sa ilang labaw nga si Police Colonel Ronald Lee, ang direktor sa IMEG, subli ang pag-monitor sa mga polis nga badlongon sa Kabisay-an.
Gawas sa nga hulagway ug video nakadawat sab og impormasyon ang IMEG hinungdan nga ila kini gi-monitor.
Subay niini ilang gihangyo ang publiko nga makig-alayon sa mga local chief of police o kaha kontakon ang IMEG Visayas Field Unit pinaagi sa ilang social media account ug ang ilang contact number nga (smart) 09480549229 ug (globe) 09951433056 aron sa pagpahibalo niini. /GMR (BANAT NEWS)
- Latest
