Unsa kaandam ang sugbo sa linog?

CEBU, Philippines — Sa hinapos nga bahin sa 2019, sunod-sunod nga linog ang nahitabo sa Mindanao hinungdan nga nitumaw ang pangutana kung unsa kaandam ang Sugbo kung kini maigo sa susamang mga linog.

Matud sa Philippines Institute of Volcanology and Seismology (PHIVOLCS) nga sukad Oktubre sa niaging tuig, mokabat sa 3,000 ka aftershocks ang natala sa 6.3, 6.5, ug 6.6 intensity nga linog sa Mindanao.

Sa labing ulahing natala nga 6.9 magnitude, nakatala sab ang PHIVOLCS og dili mominus 400 ka aftershocks sulod sa tulo ka adlaw.

Matud ni Harold Alcontin, hepe sa Cebu City Disaster Risk Reduction and Management Office, ngadto sa konseho sa Siyudad sa Sugbo nga ang ilang buhatan nagpahigayon na og mga Information Education Campaign.

Sila nanghatag og basahon nga “Pangandam sa Katalagman” sa mga barangay, buhatan sa gobiyerno, mga eskwelahan, ug ubang ahensiya.

Ang basahon adunay mga kasayuran kabahin sa saktong buhaton kung adunay linog, bagyo, sunog ug hulga sa pagpabomba.

Si Konsehal David Tumulak, pangulo sa committee on disaster risk reduction and management sa konseho, nagkanayon nga nanghatag sab sila og kopya sa maong basahon ngadto sa mga sakop sa Cebu Chamber of Commerce and Industry ug nagpahigayon sab sila og IEC sa mga DRRM offices.

Atol sa sesyon, si Konsehal Alvin Dizon nangutana kang Alcontin kung, “Are we ready to respond to an event of a 6.9 intensity earthquake to strike Cebu?”

Matud ni Alcontin nga ang ilang buhatan naghimo na og earthquake contingency plan kauban sa lainlaing ahensiya.

Ang national simultaneous earthquake drill gihimo matag tulo ka buwan diin ang mga tunghaan ug mga ahensiya sa gobiyerno gimandoan sa pagsalmot.

“With the guidance of the Office of the Civil Defense we created the contingency plan for earthquake not only for Cebu, but for the whole province together with the PHIVOLCS,” matud ni Alcontin.

Gipahibawo sab ni Alcontin nga ang Cebu City Police Office ug ang Task Force Sinulog nagpahigayon na og contingency plan alang sa umaabot Sinulog.

Laing gipangamdaman ang stampede nga giila sab nga laing delikado gawas sa linog.

“So we already have the contingency plan, we see to it that our resources are in place on that particular event, but also for the future in case there is an earthquake we can respond efficiently,” matud ni Alcontin.

Dugang niya nga ang PHIVOLCS nagpahigayon na og assessment ug nasuta nga gikinahanglan pa ang dugang pagbansay og mga collapsed structure teams sa siyudad.

“One of the worst areas in the city is the Colon street because mao na siya ang mga pinaka karaan og buildings,” sumala pa ni Alcontin.

Niadtong 2014, ang konseho sa siyudad nipasar og resolusyon alang sa retrofitting sa tanang karaang edipisyo sa dalan Colon.

Katapusang nasinati nga kusog nga linog sa Sugbo niadtong 2013 dihang ang 7.2 intensity nga linog niigo sa Probinsiya sa Bohol diin daghang nangaguba ilabi na ang mga karaang mga simbahan. /GM (BANATNEWS)