Kapin sa 300 ka armas gitahan ngadto sa polis

CEBU, Philippines — Kapin na sa 300 ka armas ang gi-surrender ngadto sa Cebu City Police Office (CCPO) City Mobile Force Company (CMFC) gikan sa bukirang bahin sa Dakbayan sa Sugbo.

Kini maoy gibutyag ni Police Lieutenant Colonel Randy Korret force commander sa CMFC subay sa gipahigayon nga minor ug major operation sa kampaniya batok sa loose firearms.

Matud ni Korret nga sa operasyon nila niadtong Miyerkules nikabat ngadto sa 14 ka nagkalainlaing klase sa armas ang gi-surrender sa residente sa bukirang lugar.

Ang maong mga armas gilangkuban sa usa ka 5.56 revolver frontier; upat ka kalibre .38 revolver; tulo ka kalibre .22 revolver; usa ka 12 GA improvised shotgun (pistol); usa ka 12 GA improvised shotgun; usa ka kalibre .357 revolver; usa ka .30 caliber Bolt Action Sniper Rifle; usa ka 5.56mm Bolt Action Sniper Rifle, usa ka .22 rifle ug ngakalainlaing klase sa bala.

Sa nilabay’ng buwan, kapin sa 200 ka armas ang gipresentar sa CMFC ngadto sa direktor sa Police Regional Office (PRO)-7 Police Brigader General Valeriano De Leon atol sa founding anniversary sa Camp Sotero Cabahug.

Kasagaran sa maong mga armas gikan pa kini sa mga apohan sa ulahing naghupot niini ug gani ang uban niini posibleng gigamit panahon pa sa World War I ug World War II.

Gawas sa high powered firearmas adunay mga granada usab ang gi-surrender.

Subay sa panawagan sa kapolisan sa pag-surrender sa mga dili lisensyado nga armas ubay-ubay na usab ang nanawag kalabot sa proseso sa pagtahan sa armas.

Gipaniguro ni Korret nga walay atubangon nga kaso ang mga boluntaryong ni-surrender sa ilang mga armas. /BDB (BANATNEWS)