SRP gihapon ang baligyaanan sa paboto

CEBU, Philippines — Sikopon ug ug imbarguhon ang mga paboto nga bisan asa lang ibaligya subay sa ordinansa sa Dakbayan sa Sugbo.

Matud ni  Konsehal Dave Tumulak, chairman of the committee on disaster risk reduction and management sa konseho sa dakbayan, nga padayon gihapon nilang ipatuman ang ordinansa nga nagtumbok sa South Road Properties nga bugtong baligyaan sa mga paboto.

Gipasabot ni Tumulak nga ang anaa gibaligya sa mga dagkung tindahan ang adunay permit.

Ang kapolisan ang gitahasan sa pagsakmit sa mga paboto nga makit-an diha sa kadalanan nga gipamaligya o sa mga kamerkaduhan.

Ang kapolisan sa Dakbayan sa Sugbo gitahasan nga mohimo og pagpatrolya ug makita diha sa kadalanan ilabi na niining nagsingabot nga Pasko ug Bag-ong Tuig.

Matud ni Tumulak nga lakip ang mga barangay tanod ang makita diha sa ilang area of responsibility sa katawhan.

Angayang bantayan ang tapokanan sa mga tawo sama sa mga malls ug mga ATM booths.

Gidasig ni Tumulak ang katawhan nga moabag sa kapolisan pinaagi sab sa pagbantay sa ilang mga lugar ug motaho kung dunay mga kadudahan og lihok. - /GMR BANAT NEWS