Pasko sa Carbon gilusad

CEBU, Philippines – Mabatyagan na ang diwa sa Pasko sa Carbon Public Market human gilusad sa kagamhanan sa Siyudad sa Sugbo ang “Carbon, Pasko Na 2019” kagahapon.

Kini ang ika-14 ka tuig sa maong kalihukan nga gipangulohan ni Bise Mayor Michael Rama.

“Gihangop namo ang ka-alegre karon, lahi sa niaging mga tuig,” matud ni Maria Pino, presidente sa Cebu City United Vendors Association Inc.

Gipasabot ni Pino nga ang kagamhanan adunay labing dakung partisipasyon alang sa pagpangandam sa programa sa Carbon Public Market karong tuiga.

Ang “Carbon, Pasko Na 2019” nagpakita og usa ka labing madasigon nga Carbon nga adunay lainlaing mga Christmas lights ug dekorasyon sa tibuok lugar.

Samtang ang Cebu City Market Authority Division nipasalig nga adunay igong suplay sa mga produkto sa merkado alang sa Pasko ug Bag-ong Tuig.

Si Jonil Matuguina, market administrator, nipasalig nga bisan nag-supply ang Carbon og mga produkto sa ubang mga lugar, igo pa kaayo alang sa mga residente sa siyudad alang sa Pasko ug Bag-ong Tuig. “As usual daku kaayo ang impact sa Carbon kay sila gyud mag-supply sa tibuok province sa Cebu, apil na sa uban pa nga mga province, rest assured na the market and as well as the vendors are working hand in hand para mahatag nato ang presko ug affordable na mga produkto,” matud ni Matuguina.

Matud ni Matuguina nga gi-monitor nila ang mga tindahan aron maseguro nga ang mga presyo sa mga produkto subay sa gitugot nga retail price nga gitakda sa Department of Trade and Industry  ug aron ma-monitor ang gidaghanon sa supply sa mga produkto.

“The market office kay sige monitor anang mga defective, mga wala’y sticker na mga timbangan, para ma-ensure nato sa publiko na sakto gayud ang ilang nakuha ug palit sa atong market,” sumala pa ni Matuguina.

Ang City Market kauban ang Department of Veterinary Medicine and Fisheries padayon nga nag-monitor sa mga produkto sa karne aron maseguro nga kini walay dala nga African Swine Fever.

Gidapit sa City Market ang publiko nga mobisita sa merkado sa Carbon aron ma-suportahan ang mga lokal nga tindera ug mga supplier alang sa umaabot nga Pasko ug Bag-ong Tuig. /GMR (BANAT NEWS)