CLO niduso na sa kaso ni Basamot sa HRDO

CEBU, Philippines — Ang Cebu City Legal Office investigating team niduso na ngadto sa buhatan sa Human Resources Development Office (HRDO) sa reklamo nga ilang nadawat batok sa pangulo sa Records and Archives Division sa Department of General Services Lorenzo Basamot.

Matud ni Atty. Rey Gealon, pangulo sa CLO nga ilang giduso sa buhatan ni Daisy Diana Ortiz, officer in charge (OIC) sa HRDO ang maong reklamo sa tulo ka empleyado sa city hall batok kang Basamot nga mao ang kalapasan sa Akta Republika 7877 kun “Anti-Sexual Harassment Act of 1995”.

Si Gealon nagkanayon nga ubos sa Section 4 sa RA 7877 obligasyon sa employer o opisyal sa mga buhatan, educational, training environment o institution nga kapugngan ang paghimo og kalapasan kalabutan sa sexual harassment.

Base sa mandato sa balaod nga kinahanglang mag-umol og committee on decorum and investigation of cases on sexual harassment ug mopahigayon og imbestigasyon niini.

Gibutyag ni Gealon nga ilaha nang giduso ngadto sa buhatan sa HRDO ang reklamo aron ang maong buhatan morekomendar ngadto kang Mayor Edgardo Labella alang sa pag-umol sa nahisgutang komitiba aron matubag ang maong giduso nga reklamo.

Dugang ni Gealon nga ang CLO maoy molangkub sa komitiba diin mao kini ang naghupot sa kaso alang sa reception of evidence ug complaint affidavits.

Ug discretion usab sa mayor ang mamahimong miyembro sa komitiba.   BDB (BANAT NEWS)