Sitio mananga 1,2 pabutangan og polis

CEBU, Philippines — Nihangyo ang mga opisyal sa Barangay Tabunok, Dakbayan sa Talisay nga mabutangan og polis matag adlaw ang Sitio Mananga 1 ug 2.

Kini human sa obserbasyon nga dihang dapita ang daghang mga badlungon sama sa kawatan, tulisan ug bisan pa ang mamaligyaay og ilegal nga drugas.

Si Konsehal Chalmer Lastimosa, chairman sa committee on peace and order sa barangay, nibutyag nga naaprubahan na ang iyang resolusyon sa konseho.

Naaghat siya sa maong lakang gumikan sa kadaghang badlungon sa lugar ug nalooy siya sa mga tarung nga nagpuyo sa lugar gumikan kay mabulabog sa mga isog nga badlungon sa katilingban.

Gani sunod-sunod ang operasyon sa maong lugar gumikan sa ilegal nga drugas nga ang mga dinakpan halos dili nagpuyo sa nahisgutang lugar.

Samtang si Police Major Gerard Ace Pelare, hepe sa kapolisan sa dakbayan, niingon nga wala siyay problema sa laraw sa mga opisyal.

Hinoon sa pagkakaron ila lang una nga ibahin ang iyang mga sakop nga mahatagan og police visibility ang maong lugar.

Sa nasayran nga duha ka police precincts ang nabuksan niadtong niaging semana sa Barangay Lawaan 1 ug Bulacao diin maoy entrance ug exit sa mga tawo nga moagi sa siyudad. (BANATNEWS) (/GMR)