Eskina Natalio Bacalso Avenue Rama gihawanan

CEBU, Philippines – Gihawanan ang sidewalk gikan sa eskina Natalio Bacalso Avenue paingon sa V. Rama Avenue lahos sa Barangay Guadalupe, Dakbayan sa Sugbo.

Matud sa pangulo sa Prevention Restoration Order Beautification Enhancement (PROBE) Team nga ang gihimong clearing operation subay gihapon kini sa Memorandum Circular 2019-121 sa Department of Interior and Local Government.

Gitahasan ni Cebu City Mayor Edgardo Labella nga mangulo sa clearing operation mao si Konsehal Renato “Junjun” Osmeña.

“Ang atoa ra man gyud gipangayo ang sidewalk for the pedestrian so ang ako lang seguro hangyo lang nako para ninyo nga you’re using the sidewalk for your own personal ingon ta personal interest for how many years you’ve been using the sidewalk now it’s high time nga atong ibalik ang sidewalk ngari sa publiko,” matud sa pangulo sa PROBE Team nga si Racquel Arce.

Dunay nakauyon sa clearing operation diin matud ni Cleofe Bacurnay nga mas maayo nga nalimpyuhan ang sidewalk tungod kay ang mga tawo anha na moagi sa karsada kay ang sidewalk napuno sa istraktura.

“Nakauyon para malimpyo ang dalan kay ang ubang namaligya naa naman gud sa sidewalk, para malimpyo ba dili maka cause og traffic, traffic kaayo nya maglisud tag agi sa dalan kay naay maligya mao na mas maayo gyud i-clear niya pangitaan gyud na sila og maayo nga pwesto nga makapamaligya sila sa ilang panginabuhi, dili mawagtangan sa ilang panginabuhi,” matud ni Bacurnay.

Ang clearing operation giabagan sa Department of Public Works and Highways, City Traffic Operation Management ug uban pa.

Matud ni Jonathan Villas sa PROBE nga ang sukod nga gisitar sa DPWH maoy ilang sundon ilabi na kadtong naglapas sa dalan.

Sumala pa ni Villas, kinsa nahinabi sa Banat News dili mominos lima ka mga establishment ang ilang naguba human nakalapas sa kadalanan.

Gisakmit sab sa mga tinugyanan sa CITOM ang mga ilegal nga nag-parking nga mga motorsiklo.

Una na nga gihatagan og usa ka buwan nga lugway ang paghawan sa lugar apan daghan gihapon ang nagmagahi maong gipahigayon ang operation.

Usa ka residente sa lugar nga si Mila Nabua nitug-an nga gihatagan sila og lugway aron personal nga moguba sa ilang gambalay nga nakalapas aron mahimo pa nila kining magamit ilabi na ang mga kahoy. (Rowena D. Caapistrano/GMR)(BANAT NEWS)