Gabby Malagar nitaliwan na
CEBU, Philippines — Nitaliwan na ang beteranong sportswriter sa The Freeman ug Banat News nga si Gabriel “Gabby” Malagar sa edad nga 63-anyos.
Gitawag og “Gabmal” sa iyang mga suod nga higala, si Malagar niabot sa Sugbo aron unta pagkuha og kurso nga marine engineering apan wala gitugot sa kahigayonan ug nipadayon isip tigbalita sa Visayan Herald, dyLA, The Morning Times, The Republic News hangtud sa The Freeman sugod niadtong Agosto 1986 isip sportswriter.
Daghang sporting events ang iyang na-cover sama sa boxing ug mga basketball sama sa National Inter-Collegiate Basketball Championships ug PBA games diin usa niini ang 28th Summer Universiade sa Gwangju, South Korea niadtong Hulyo 2015.
Tungod sa kalantip sa iyang salabutan ug panumduman, gitawag siya sa iyang mga higala og “walking encyclopedia of Cebu sports.”
Alang sa The FREEMAN sports editor nga si Manny Villaruel, si Malagar usa ka model writer kinsa nakatandog sa kinabuhi sa uban.
“During my fledging days as a sportswriter was back in 1996, he was one of my mentors. He guided me every step of the way. He may have a strong personality, but Gabmal has a soft and generous heart,” matud ni Villaruel. Sa wala pa siya niretiro niadtong 2016, si Malagar ang senior sportswriter sa The FREEMAN ug assistant sports editor sa Banat News diin sab siya nagsuwat og sinemanang lindog nga giulohan og SportsGab.
Nahimo sab siya nga sakop sa board of directors sa Cebu News Workers Multi-Purpose Cooperative niadtong 2013 hangtud 2019 ug kasamtangang sakop sa ethics committee sa maong kooperatiba.
Si Malagar lumad nga taga Poro, Isla sa Camotes ug naminyo kang Ging-ging dihang kauban sila sa gitrabahoan nga The Republic News ug dunay duha ka anak nga sila si Matt Erikson ug Nicole. (BANATNEWS)
- Latest
