Idlas nga pusher nakuhaan og P1.7 milyong shabu

CEBU, Philippines – Usa ka idlas nga high value target sa kapolisan sa kampanya kontra illegal nga drugas ang nadakpan na gyud sa kataposan ug nasakmitan og P1.7 milyon balor nga shabu sa buy bust operation sa Barangay Duljo Fatima, Dakbayan sa Sugbo niadtong Lunes sa gabii. Alas-11 sa gabii nadakpan si Nelson Abelgas Booc alyas Aton, 33 anyos, nagpuyo sa Sitio Bayotan Panaghiusa, sa maong barangay. Base sa report sa kapolisan, nakuha gikan sa maong suspek ang 255 ka gramos sa gituohang illegal nga drugas.

Ang bagong tigpamaba sa Cebu City Police Office nga si Police Major Clark Arriola nagkanayon nga niadtong Pebrero karong buwana gihatdan sa Mambaling Police Station si Booc og search warrant tungod sa mga report nga namaligya kini og illegal nga drugas, apan nakasibat kini.

Tungod niini giapil kini sa drug watchlist sa estasyonan sa Mambaling. Swerte nga karong buwana lang giingon nakakita ang mga polis og police asset nga adunay koneksyon kang Booc nga nakatabang sa pagkasikop niini.

Gitataw hinuon ni Arriola nga si Booc dili konektado sa nadakpan didto sa Guadalupe Police Station kinsa nakuhaan sab og P7 milyones balor sa illegal nga drogas niadtong Lunes.

Nasayran nga nasikop sa operasyon niadtong Lunes sa alas tres sa hapon didto sa sitio Lumbane Guadalajara, barangay Guadalupe ang usa ka giila nga si Myla Delumbar 29 anyos, residente sa Pasil apan kasamtangang nangabang og balay sa maong dapit. Nakuha gikan kaniya ang kapin sa usa ka kilong shabu nga gisulod sa blue nga plastic bag nga mobalor sa P7 milyones, samtang nakasibat ang iyang kapuyo nga si Gilbert Granada Claros 26. Ang direktor sa Cebu City Police Office nga si Police Colonel Gemma Vinluan mibutyag nga HVT sab ang maong babaye ug anaa kini sa Unified Drug Watch list.

“HVT na ‘yun, unified drug watchlist na ‘yun higher level na ang nakuha natin. Ito ay bunga ng efforts ng ating intel operations ng ating police stations,” si Vinluan nagkanayon. (/IBM)(BANAT NEWS)