Panulis sa awol nga polis inside job

CEBU, Philippines — Gituohang inside job ang nahitabong pagpanulis sa nag-awol nga polis sa usa ka head guard sa Barangay Tisa, Dakbayan sa Sugbo niadtong Martes sa hapon.

Ang direktor sa Cebu City Police Office nga si Police Colonel Gemma Vinluan nagkanayon nga lig-on ang ilang ebidensya nga inside job ang maong hitabo sanglit nakaykayan nila sa cellphone sa napatay’ng suspek nga si Police Corporal Jobie Antipolo nga adunay kasabot.

Nabasahan nga adunay naghatag og impormasyon kun diin moagi si Edwin Velos dala ang kwarta nga igsu-sweldo sa mga kaubang guwardiya.

Patay diha-diha niadtong Martes sa hapon si Antipolo samtang nakasibat ang kakunsabo niini.

Gitin-aw sa hepe sa Labangon Police Station nga si Police Major Henrix Bancoleta nga P300 mil na lang ang kwarta sanglit giingong gikan na nanweldo sa Dakbayan sa Mandaue si Velos.

Giingong gisulod sa U-box sa motorsiklo ang kwarta apan sa pagnaug niini sa maong dapit giatngan kini sa usa ka riding-in-tandem ug nideklarar og tulis.

Gipusil nila si Velos ug dayon gisakyan sa usa sa mga suspek nga wala pa mailhi ang motorsiklo sa biktima samtang si Antipolo maoy nagmaneho sa scooter nga ilang unang gisakyan.

Dihang paingon na sila mosibat, usa ka armadong lalaki ang nibutho og gipamusil ang mga suspek.

Napatay sa maong lalaki ang nag-awol nga polis samtang nakasibat ang kauban niini sakay sa motorsiklo sa guwardiya diin didto ang kwarta.

Matud ni Vinluan nga lakip nga himoong suspek ang nipusil sa riding-in-tandem sanglit duda nila nga kakunsabo ra nga nitraydor human nakitang malampusong nakuha sa duha ang kwarta gikan kang Velos. Samtang gisubay sab ang tanang tambalanan sa Dakbayan sa Sugbo ug sa mga silingang lugar kun aduna bay nagpatambal nga napusilan sanglit base sa imbestigasyon nasamdan sab ang suspek nga nakasibat.

Sa wala pa nag-awol si Antipolo, nadestino ki ni sa Sogod Police Station niadtong Septiyembre 6, 2017 ug nag-awol na kini niadtong Marso 2018.

Ang direktor sa Cebu Provincial Police Office nga si Police Colonel Roderick Mariano nagkanayon nga kasamtangan pa nilang giukay kun unsa ang kaso kaniadto ni Antipolo.

Sa laing bahin, ang kapolisan sa Dakbayan sa Mandaue makig-alayon sa imbestigasyon tali sa nanulis nga nag-awol nga polis sanglit daku ang ilang pagduda nga mao sad kini ang nanulis sa messenger nga nagdala og P800 mil nga payroll sa Dakbayan sa Mandaue.

Butyag sa direktor sa Mandaue City Police Office nga si Police Colonel Jonathan Abella nga niadtong Agosto 5 gitulis sab sa riding-in-tandem ang messenger sa usa ka manpower company sa North Reclamation Area, Barangay Subangdaku.

Malampusong nakuha sa mga suspek ang backpack sa messenger diin gisulod ang kwarta.

Gipusil sab ang biktima nga messenger ug maayo nalang kay luwas na ang kahimtang niini karon. (GMR) (BANAT NEWS)