Tabo sa Kapitolyo hangtud Biyernes
CEBU, Philippines – Pormal nga gibuksan kagahapon ang tinuig nga Agri-Fishery Trade Fair nga gitawag og Tabo sa Kapitolyo isip kabahin sa pagsaulog sa ika-450 nga founding anniversary sa Probinsiya sa Sugbo.
Gipangulohan ni Davao City Mayor Sarah Duterte-Carpio ug Gobernador Gwen Garcia ang ribbon cutting ug sunod nilang gisuroy ang nagkalain-laing display sa mga produkto gikan sa matag munisipyo.
Ang trade fair gisalmutan sa 46 ka Local Government Units (LGUs) sa Lalawigan sa Sugbo samtang dunay nisalmot gikan sa Probinsiya sa Bohol, 19 ka private sectors ug usa ka non-government organization nga namaligya og mga organic products.
Matud sa Provincial Agriculture Officer Marya Zea Villaganas nga mas daghan ang nisalmot sa maong kalihukan kung itandi sa niaging tuig.
“Sa last year, sa LGUs mas daghan kaayo karon kay 53 man ta no? 7 ra ang wala ka participate, kay agri-fair man this is the right time for them to showcase sa ilang mga agri-products,” matud ni Villaganas.
Iya sab gimanduan ang mga maninda nga dili magpalabi og pataas sa presyo tungod kay libre na ang transportasyon sa mga mag-uuma ug manindahay ug wala sab silay gibayran nga abang gawas sa private exhibitors nga nagbayad og P1,500 sulod sa lima sa adlaw.
Gawas sa pagpaninda sa mga prutas, isda ug mga utanon, duna sab silay cooking demo kung diin magluto ang pinili nga munisipyo sa ilang tagsa-tagsa ka delicacies.
Magsugod ang trade fair sa alas 7 sa buntag ug magdepende na sa mga maninda kung unsa silang orasa manirado sa gabii. (/GMR)(BANAT NEWS)
- Latest
