Dul-an sa P300 mil nga shabu nasakmit atol sa buy-bust
CEBU, Philippines – Nikabat ngadto sa P247 mil ang kantidad sa shabu nga nasakmit sa gipahigayong buy-bust operation sa kapolisan gikan sa giingong street level target niadtong Martes sa hapon diha sa Sitio Catwalk, Barangay Duljo Fatima, Dakbayan sa Sugbo.
Ang nasikop sa kapolisan sa Mambaling Police Station mao si Roger Suarez Navarro,35-anyos residente sa maong dapit.
Nasakmit gikan kang Navarro ang 13 ka lain-laing gidak-on nga paketeng shabu nga nitimbang ngadto sa 40.3 ka gramos ug nibalor sa nahisgutang kantidad.
Sa laing bahin, nikabat ngadto sa P48 mil ang kantidad sa shabu nga nasakmit gikan sa suspetsadong drug pusher atol usab sa gipahigayong buy-bust operation sa kapolisan diha sa Sitio Holy Name, Barangay Mabolo, Dakbayan sa Sugbo sa mao gihapong adlaw.
Nasikop si Lloyd Gebuela Fontanos, 35-anyos, taga Subangdaku Wireless, Dakbayan sa Mandaue.
Si Fontanos giingong nasakmitan kini sa kapolisan sa Mabolo Police Station og duha ka paketeng shabu nga nitimbang tanan sa pito ka gramo ug nibalor ngadto sa P48 mil ug P1,000 nga buy-bust money. (Jezebel G. Braulio/BDB)(BANAT NEWS)
- Latest
