Nasunogan giduaw ni Gwen
CEBU, Philippines – Gibisita ni Gobernador Gwendolyn Garcia ang mga biktima sa sunog sa Barangay Tipolo, Dakbayan sa Mandaue niadtong Martes sa hapon diin nagdala kini og mga hinabang.
Gisugat si Garcia sa mga opisyal sa dakbayan nga gipangulohan ni Mayor Jonas Cortes ug mga opisyal sa barangay nga gipangulohan ni Kapitan Romana Cuizon.
Si Marivic Garces, pangulo sa Provincial Social Welfare and Development Office, niingon nga sulod sa binalde nga hinabang ang lima ka kilong bugas, 13 ka putos nga noodles, upat ka lata nga canned goods, 12 ka putos nga coffee, duha ka tumblers, water containers, kaldero, habol, banig ug uban pa sa matag pamilya.
Si Maricel Yu, pangulo sa City Social Welfare Office (CSWO), niingon nga sa nagpadayon nila nga ihap sa mga biktima ilang natala ang 1,883 ka molupyo sa Sitio Maharlika, Espina Compund ug Basubas Compound sa Barangay Tipolo.
Si Cortes niingon nga ang matag pamilya nga tag-iya sa panimalay nga nasunog ang makadawat og P10,000 gikan sa kagamhanan sa dakbayan ug P5,000 sa mga biktima nga nag-abang og panimalay sa maong dapit. (/GMR)(BANAT NEWS)
- Latest
