Inside job gisubay bahin sa pagtulis, pagsunog sa Kapa

CEBU, Philippines — Ang kapolisan moumol og Special Investigation Task Group alang sa pagsulbad sa pagpanulis ug pagsunog sa buhatan sa kontrobersyal nga Kapa Community Ministry International Incorporation didto sa Compostela niadtong Sabado sa kaadlawon.

Usa sa buot nilang sutaon kun nganong gisunog pa gyud sa mga tulisan ang opisina kun nakuha na nila ang kwarta gikan sa vault.

Samtang ang National Bureau of Investigation nipahibalo nga may kamandoan na gikan sa taas paghimo og aksyon batok sa Kapa.

Ang hepe sa Compostela Police Station nga si Police Captain Ian Macatangay mitug-an sa Banat News nga ang maong SITG langkoban sa imbestigador sa ilang estasyonan inabagan sa Cebu Provincial Police Office.

 Butyag ni Macatangay nga nakakuha na sila og Closed Circuit Television (CCTV) footage gawas sa maong buhatan apan wala makita didto ang mga gikatahong suspek nga nanulis sa 21 ka mga in-house nga mga empleyado ug nisunog sa maong opisina.

 “Nay white van nag park unya wala man say tao nakita igo ra ni-park

White van ra gyud, unya nilakaw ra ditso, walay nigawas,” butyag niini.

Wala sab plaka ang maong sakyanan. Matud pa nga ang maong puti nga van maoy gitumbok sa mga empleyado nga gisakyan sa 10 ka mga tulisan nga mikuha sa ikaduhang vault sa maong opisina ug pagkahuman gisunog ang ilang buhatan.

Sa pagabot sa mga imbestigador walay nakuhang footages sa CCTV diha sa maong opisina kay nangasunog sab kini. Pagkakaron, dili pa makasulti ang kapolisan kun tinuyo ang pagsunog sa maong opisina.

Nagkanayon ang hepe nga sukad-sukad sa maong lungsod kadto pa sila nakasugat og modus sa mga tulisan nga sunogon ang balay patigayon human kini tulisa.

“Sunog man gud lain sad nga style ba. Naa siguro ni something deeper siguro kay nganong sunogon pa man? Kay og kwarta lang ang tuyo, wa na nanglakaw na unta to, nakuha na man nila ang kwarta, nganong sunogon pa man gyud?,” sigun pa sa maong hepe.

Sa pagkakaron, nagpaabot pa ang kapolisan og investor o mga investors sa KAPA nga moreklamo human sa nahitabong sunog ug pagkawagtang sa kwartang ilang gi-invest.

 Ang PRO-7 pinaagi ni Brig. General Debold Sinas una nang namahayag nga ‘investment scam’ ang maong kompanya ug duna pay ubang mga susama niini nga pyramiding scam gikan sa Mindanao nga daghan nang nabiktima didto ug nia na karon sa Visayas.

Ang pangulo sa Security Exchange Commission nga si Attorney Alma Dalena atol sa interview sa DYHP nagkanayon nga bisag usa ka charismatic organization ang KAPA, nangolekta kini og kwarta nga kunohay donasyon.

Gisaaran ang nag-donate nga mabalik ra ang kwarta niini ug mapun-an pa og ginansiya ug modako ang grasya kun mas dako ang donasyon nga gituohan sa mga otoridad nga ‘investment.”

Samtang si Atty. Tomas Enrile ang regional director sa NBI- Central Visayas miingon nga adunay inter-agency plan nga himuon batok sa Kapa.

 “Basta within this week may aksyon tayo dyan . hindi natin pwde idisclose ang detalye ng trabahong yan. May coordination kaming gagawin para sa inter-agency to. Yung order natin coming from our central office” matud ni Enrile.

Si Duterte una ng nagkanayon nga ang operasyon sa Kapa tataw nga operayson sa pyramiding scheme nga nangolekta og kwarta gikan sa mga membro niini aron ihatag sa mga pioneering operators sa grupo. (Le Phyllis Antojado/IBM)(BANATNEWS)