Ikaduhang standard police station sa siyudad tukuron

CEBU, Philippines – Ikaduhang standard police station sa Dakbayan sa Sugbo tukuron sa Guadalupe Police Station.

Nag-ground breaking kagahapon ang kapolisan inubanan sa advisory council niini.

Sa plano, Type BC building kini diin tulo ka andana ug adunay lapad nga parkingan.

Matud sa hepe sa maong estasyonan nga si Police Major Dexter Basirgo nga sa Hunyo 17 sugdan ang demolisyon sa karaan nila nga estasyonan ug sugdan og tukod sa susamang luna ang ilang bag-ong building karong Hulyo. Gibana-bana kining mahuman karong Disyembre.

Samtang gitrabaho pa ang ilang estasyonan, adto una sila mag-opisina sa Day Care Center sa Barangay Guadalupe nga gitagana sa mga opisyal sa maong barangay.

“Ang atong police station is no longer conducive for working, sa gidaghanon sa atong personnel and sa atong madakpan, huot gyud kaayo,” sigun ni Basirgo.

“So, hopefully with the new police building makahatag na ta og convenience sa ato personnel and maka-develop ta og self-esteem during their day-to-day performance of duty,” dugang niini.

Mokabat sa P5.4 milyones ang gitagana nga pundo sa Camp Crame alang sa maong bag-ong estasyonan.

Ang Abellana Police Station maoy unang standard police station sa Dakbayan sa Sugbo. (/GMR)(BANAT NEWS)