Kalabira sa tawo nakaplagan

CEBU, Philippines – Napalgan sa usa ka lumolupyo diha sa labong nga kakahoyan sa Barangay Canagahan sa Lungsod sa San Remigio ang usa ka kalabira nga gituohang iya sa usa ka lalaki nga gituohang dugay na nga namatay didto.

Si  Police Master Sergeant Rino Inso sa San Remigio Police Station miingon nga usa ka  Florentino Sumagang Masbang, 47, taga Purok Patag, Barangay  Libho, sa  Lungsod sa Borbon  ang nasum-ok sa labong nga kakahoyan sa maong dapit sa pagpangahoy niini. Samtang nanguha kini og kahoy nakit-an niini ang maong kalabira sa tawo nga nagsul-ob og long-sleeve nga puting t-shirt nga gisapawan og itom nga jacket, karsones nga maong ug brown nga bakus.

Dali siyang mibiya sa lugar ug misumbong sa kapolisan sa San Remigio. Kauban ang municipal health officer sa lungsod ilang giadto ang lugar ug base sa pagsusi sa mga bukog, iya kini sa usa ka lalaki.

Gibanabana sa municipal health officer nga usa ka bulan ngadto sa duha ka bulan nang namatay ang maong lalaki. Apan wala pa silay nakit-ang timailhan kun kinsa kini ug kun unsay gikamatyan niini. (/IBM)(BANAT NEWS)