Eskwelahan pabakwitan lang kung wala nay laing lugar
CEBU, Philippines – Buot sa Department of Education nga himoon lang nga “last option” ang mga eskwelahan nga himoon nga evacuation center sa mga tawo kung adunay katalagman.
Si Dr. Rhea Mar Angtud, ang Cebu Provincial Schools Division Superintendent nagkanayon, nga apektado ang mga tinun-an panahon kun adunay kalamidad.
Kini dili lang tungod kay posible nga naguba tungod sa katalagman apan apil na usab ang paghimo nga temporaryong puy-anan sa mga bakwit sa mga lawak sa eskwelahan.
"Ang classroom para siya sa klase meaning kung, naay magpuyo dili maklasehan, ang mahitabo ana ang atong mga bata, maalkanse man sa pagtudlo nila," matud ni Angtud.
Matud ni Angtud nga aduna may mga giila nga mga evacuation centers sa ilang tagsa-tagsa ka lugar apan kun wala nay kapadulngan adto na sa eskwelahan.
Siya nipasabot nga dili usab mobalibad ang DepEd kun adto sa eskwelahan papuy-on ang mga bakwit ilabi na nga mga residente usab kini sa lugar ug mga ginikanan sa mga tinun-an.
Si DepEd Secretary Leonor Briones una na nagkanayon nga dili dapat himoon nga evacuation center ang mga eskwelahan.
Matud niya nga mismo si Presidente Rodrigo Duterte nagkanayon nga dili angay nga adto dayun pabakwiton ang mga residente sa mga tunghaan gawas lang kun grabe na ang kaso sa emergency o katalagman kun diin ang ubang inprastraktura sama sa multi-purpose gym dili na gyud mapapuy-an pa tungod kay apil usab sa naguba.
Matud ni Briones nga mokaon og oras o panahon una pa makabalik sa klase kun gamiton nga evacuation centers ang mga eskwelahan sanglit ang DepEd kinahanglan pa usab manglimpyo o moayo sa mga lawak ug mga butang sa eskwelahan. (/GMR)(BANAT NEWS)
- Latest
