1st Cebu City heritage week gibuksan

CEBU, Philippines — Nagkalain-laing kalihukan ang masaksihan sa mga Sugbuanon subay sa labing una nga Cebu City Heritage Week Celebration nga gibuksan kagahapon sa Plaza Independencia.

Nagkanayon ang officer-in-charge sa Cultural and Historical Affairs Commission (CHAC), Bryner Diaz, nga matapos ang kalihukan karong Biyernes.

Kini nahimo pinasikad sa usa ka ordinansa nga nag-deklarar sa katapusang Biyernes sa buwan sa Mayo isip “Gabii sa Kabilin” ug niadtong 2016 dunay giusab sa ordinansa diin gipalapdan kini pinaagi sa pag-apil sa katapusang semana sa Mayo isip Cebu City Heritage Week.

“Duna pud tay giandam nga mga heritage tour, guided tour, walking tour diri dapit sa Fort San Pedro padulong sa Cebu Heritage Monument, duna pud tay mga talks nga ipahigayon about history sa Cebu, about Cebuano language, heritage architecture and then duna pud tay mga istorya sa myths and fables sa Cebu City,” matud ni Diaz.

Subay sa maong kalihukan, lakip sa giandam sa pagbukas sa Cebu City Heritage Week ang mga indigenous games sama sa tubig-tubig, takyan, sungka ug uban pa.

Ang nag-andam sa maong mga indigenous games mao ang Fort San Pedro ug Cebu City Parks and Playground Commission pinangulohan ni Dr. Ado Macaraya.

“Unlike today wherein our children are using this electronic gadgets, the computer, in which wala’y interaction so this the reason why we presented ourselves to lead the presentation of the activities of the indigenous game during the Heritage week,” sigun pa ni Macaraya.

Nagkalain-laing kalihukan ang giandam sa CHAC matag adlaw subay sa maong selebrasyon.

Giawhag ang mga residente sa Siyudad sa Sugbo ingon man mga ang turista sa pagapil sa mga kalihukan gumikan kay libre kini.

Ang kagamhanan sa siyudad nitagana og P60,600 nga budget alang sa kinatibuk-ang kalihukan sa Cebu City Heritage Week. (GMR) (BANAT NEWS)