SITG planong umolon sa kaso ni Bontuyan

CEBU, Philippines — Nagplano na ang Police Regional Office 7 nga moumol og Special Investigation Task Group sa pagsulbad sa kamatayon ni Police Captain Delfin Bontuyan

Sa pagkakaron wala pa gihapoy natumbok nga bisan usa ka person of interest. Sigun ni PRO-7 Director Debold Sinas nga ang paglaum na lang nila nga mailhan ang mga mamumuno mao ang dashboard camera sa taxi nga nakatapad ni Bontuyan sa karsada atol nga siya gipusil.

Giawhag sab sa kapolisan kung kinsa kadtong nakanawong sa mga mamumuno nga makig-alayon sa ilang imbestigasyon aron mabuhatan og composite sketch ang mga responsable sa krimen.

“On going karon ang back tracking sa mga kaso niya sa CIDG sa una. We also coordinated with PRO-ARMM,” ang heneral nagkanayon.

Niadtong Mayo 21 gikan nitambong og hearing ang 55-anyos nga polis dihang gibanhigan sa duha ka pares sa riding-in-tandem samtang nagsubay sa Pope John Paul Avenue, Mabolo, Dakbayan sa Sugbo pipila ka metros lang ang gilay-on gikan sa Mabolo Police Station.

Sa pagkakaron gihaya sa ilang panimalay ang maong polis ug gikatakda kining ilubong karong Huwebes.

Samtang ang PRO-7 giingong abli mohatag og gun salute kang Bontuyan kung mohangyo ang pamilya ingon man ang PRO-ARMM diin kini nadestino ug pagbutang og honor guard sa haya.

Sa pagkakaron, police visibility ra ang gibutang sa kadagkuan sa kapolisan aron maseguro ang seguridad sa kabanay. “Magpaabot lang mi if naay request kay baka intrusive ra kaayo,” sigun sa maong heneral. (BANAT NEWS)