Patrol cars duol sa balay ni Osmeña gikabalaka

CEBU, Philippines — Naglumba pagpanggawas sa ilang panimalay agi og pagsuporta kang Cebu City Mayor Tomas Osmeña ang iyang mga dumadapig tungod matud pa sa lima ka patrol cars nga naglabaylabay sa  gawas sa balay niini diha sa Sitio Fatima Hills, Barangay Guadalupe, ning siyudad.

Ang maong hitabo gi-post sab ni Osmeña sa iyahang official Facebook page.

“ATM: 7 masked police with military fatigues and M16s parked right outside my house. Their faces are completely covered with masks, hats, and sunglasses. They refuse to come down or say anything,” tipik sa post sa mayor.

Sa pag-adto sa Banat News sa lugar nakita nga dunay usa ka patrol car nga nag-park dili layo sa balay sa mayor ug ang mga dumadapig ni Osmeña nagtapok sab sa lugar.

Usa sa mga tigpaluyo ni Osmeña kansang ngalan wala niini ibutyag alang sa iyang seguridad miingon nga dunay hulga sa kinabuhi sa mayor maong nanggawas sila.

Dihang migawas si Osmeña naninggit ang mga tawo pag-abiba kaniya. Matud pa nga duolon unta niini ang patrol car apan daling mibiya ang mga polis.

Dako ang pagtuo ni Osmeña nga si Cebu City Police Office Director Colonel Royina Garma ang nagpadala sa maong mga polis.

“I have strong faith in the Cebuanos. I have a very strong faith in the Cebuanos. I will not back down on this, in the end our political will, will prevail,” asoy pa ni Osmeña.

Apan si Garma miklaro nga walay nalapas nga balaod og tawhanong katungod ang kapolisan ug ang pagpatrolya sa mga polis kabahin sa seguridad sa piniliay.

“We have to secure everyone, we can’t afford to lose mga candidates, ganun lang yun ka simple. Kung wala kang kinatatakutan you should never worry they should not be afraid. He claimed to have threats in his life so kung maisahan yan, kami pagbibintangan,”si Garma miingon sa Banat News.

Matud  ni Garma nga nagtaptap sa nawong ang mga polis kay nabalaka silang makuhaan og hulagway sa mayor nga iya nasab i-post sa social media.

Ang kaatbang ni Osmeña nga si Bise Mayor Edgardo Labella sa pakighinabi sa Banat News sa telepono miingon nga bisan sa ilang balay dunay magpatrolyang mga polis.

“I welcome that development they’re just doing their jobs. Those who are law abiding citizens there has nothing to worry that is for our protection especially this is election season,” sigun niini. (Camille Pateres/IBM)(BANATNEWS)