Skatepark sa syudad sugdan og tukod human sa eleksyon
CEBU, Philippines – Opisyal nga sugdan ang konstraksiyon sa skate park facility sa likod nga bahin sa Fort San Pedro human sa National ug Local Elections karong Mayo 13.
Si Konsehal Eugenio Gabuya Jr., Chairman sa Committee on Games, Amusement and Sports, miingon ang pribadong architect ug ang Cebu City Sports Commission nahuman na sa pagproseso sa gikinahanglan nga mga rekisitos.
Ang maong mga permit naglangkob sa development permits, planning permits, electrical permits ug uban pang rekisitos alang sa konstraksiyon sa maong pasilidad.
“Ang update sa skate park everything is ready, all the permits. Two or three days ago nagpinirmahay na gyud ang mga engineer ug ang tanan, so in other word complete na gyud, ang pagtrabaho nalang”, matod ni Gabuya.
Nitumaw ang maong hisgutanan human sa lima ka buwan na ang nakalabay dihang gipahigayon ang ground breaking wala pa makita ang maong pasilidad alang sa mga mahiligon sa skate board.
Gipasabot ni Gabuya, naghuwat sila sa mga concerned office nga makakompleto sa tanang permits sa dili pa ang konstraksiyon aron malikayan ang irregularidad sa umaabot.
Kini midugang nakuha niya ang tando ni Mayor Tomas Osmeña nga magsugod sa konstraksiyon human sa eleksiyon sanglit bag-ohay lang nga nakuha nila ang tanang permits.
“Nakompleto na gyud four days ako, unya hapit naman gyud ang election busy naman gyud kaayo so mao na nakig-istorya ko ni Mayor Tom nga after nalang gyud sa election sugdan, okay ra siya”, dugang sa Konsehal.
Sa phase 1 sa skate park, gibana-bana nga moabot sa tulo ka buwan ang construction period niini, diin ang pundo nga gigamit alang sa phase one katong P5 million nga gidonar sa igsuon ni Mayor Osmeña nga si Maria “Minnie” Victoria Osmeña.
Makita sa desenyo sa skatepark ang rink nga dunay street course, flat course alang sa beginners, half pipe, bowl, pump truck ug mini grand stand. —/LPM (BANAT NEWS)
- Latest
