Mga barangay nga dunay PAGs angay ibutyag-Tumulak

CEBU, Philippines — Si Konsehal Dave Tumulak, Chairman sa Committee on Public Order and Safety miasoy nga mangayo sila og lista gikan sa kapulisan sa mga lugar ug mga barangay nga matud pa adunay mga armadong grupo (private armed groups) nga giingong gamiton sa umaabot nga May 2019 elections.

Kahinumduman nga ang kapulisan nibutyag nga aduna silay walo ka mga armadong grupo nga giingong private armies sa pipila ka mga politiko sa siyudad sa Sugbo alang sa umaabot midterm elections.

Giingong ang maong grupo nag-operate sa bukirang barangay sa siyudad.

Apan nagdumili nang daan ang kapulisan sa pagbutyag sa mga ngalan sa mga barangay samtang naghimo sila og imbestigasyon. (Decemay P. Padilla/IBM)

Upat biktima sa pagpamusil

Upat ka mga tawo ang nakalas sa managlahi nga pagpamusil sa Sugbo sulod lang sa 24-oras dinhi sa Sugbo.

Patay ang usa ka 39-anyos nga lalaking nagpalit og gatas para sa iyang anak  diha sa Barangay Busay sa Dakbayan sa Sugbo. Ang nakalas mao si Roland Ardiente, residente sa maong lugar.

Matud pa ni Senior Police Officer Antonio Din sa Mabolo Police Station, gikan nagpalit og gatas ang biktima ug padulong na kining mouli sa ilang balay sa dihang gipusil sa wala mailhing mamumuno.

Personal nga bangi ang gisubay nilang motibo sa maong krimen apan molili sab sila sa ubang posibleng motibo.

Ikaduhang pagpamusil nahitabo kagahapon sa buntag sa may Barangay Maribago, sa Dakbayan sa Lapu-Lapu ang biktima mao si Matt Ranilio Baring, usa ka vendor nga usahay mag tour guide sa mga turista.

Ang igsuon niini nga si Melinda Baring nitug-an sa kapolisan nga napriso na kaniadto ang biktima apan wala siya masayod kun unsay motibo sa pagpatay niini.

Samtang laing biktima sa pagpamusil mao si Bonifacio Villajanan, alyas Boy taga Sayao Masaba sa Lungsod sa Argao. Ang biktima gikan sa tabo sa Barangay Sua sa dihang pag-abot sa maong dapit kalit kining gipusil.

Ang kapulisan naghimo pa og imbestigasyon ug wala nila isalikway ang posibilidad nga personal nga bangi ang motibo.

Sa Dakbayan sa Talisay, patay sab ang usa ka Joey Repaso human gipusil sa wala mailhing mamumuno sa Sitio Mananga 2, Barangay Tabunok kagahapon sa alas 4:15 sa kaadlawon samtang kini naglakaw sa dapit. (Romeo Limpangog ug Gabriel Bonjoc/IBM)(BANATNEWS)