Abrugena ug Conag gihatagan og duha ka semana

CEBU, Philippines – Gihatagan og duha ka semana ni PNP chief Director General Oscar Albayalde ang hepe sa Cebu Provincial Police Office Senior Superintendent Manuel Abrugena ug hepe sa Talisay City Police Station Superintendent Marlu Conag sa pagsulbad sa kaso kabahin sa pagpamanhig sa mayor sa Lungsod sa San Fernando ug sa bana niini nga presidente sa Association of Barangay Captains sa lungsod. 

Ang maong duha ka opisyal sa kapolisan parelibohan ni Albayalde ug papulihan og lain kong dili kini makatuman sa gihatag niya nga panahon sa pagsulbad sa kaso.

Niadtong Martes sa gabii ang magtiayong Ricardo “Nonoy Reluya, Jr. ug  Lakambini “Neneth” Reluya uban sa ilang drayber ug mga body guard sakay sa ilang Super Grandia van ang gibanhigan diha sa Cebu South Coastal Road (CSCR) habig sa Barangay Linao, Dakbayan sa Talisay.

Patay sa maong insidente si Ricardo ug ang duha nila ka kauban nga sila si Alan Bayot ug Ricky Monterona. Samtang luwas si Lakambini, Giovani Perez ug Tolentin Jiffer kinsa parehong gidala sa tambalanan. Samtang si Albayalde nimando usab sa Criminal Investigation and Detection Group (CIDG) nga moapil usab sa pagpahigayon og imbestigasyon.

Si Albayalde nitumbok og example kabahin sa pagpatay kang Ako Bicol party-list Representative Rodel Batocabe sa Daraga, Albay diin walay duha ka semana nasulbad ang kaso.

Matud ni Albayalde nga dili siya motuo nga ang paghatag niya og deadline pagsulbad sa kaso moresulta ngadto sa dili maayo nga imbestigasyon.

“If you will use your fertile imagination and initiative, ito yong gusto nating mangyari”, matud ni Albayalde. Gikataho nga si Lakambini nagtuo nga dunay kalabutan sa politika ang maong pagpamanhig kanila.

Si Albayalde sa iyang bahin, nagkanayon nga normal sa mga politiko kinsa biktima sa pagpamanhig ang motumbok sa iyang kaatbang.

Matud ni Albayalde nga pwede silang morekomendar sa Commission on Elections (Comelec) sa pagpabutang sa San Fernando ubos sa Election Watchlist.

Si Albayalde niawhag sa mga politiko ug supporter nga dili mohimo og mga bayolenteng pamaagi. (Gikan sa Philippine Star News Service/BDB)