DWUP nisusi sa lugar nga nasunogan sa Duljo-Fatima
CEBU, Philippines — Gibisita sa Division for the Welfare of the Urban Poor (DWUP) ang Barangay Duljo-Fatima nga naigo sa sunog niadtong Disyembre 25 sa niaging tuig ug niadtong Enero 5 niining tuiga.
Matud sa operations head sa DWUP Genevieve Alcoseba nga nibisita sila sa unang nasunogan aron pagtan-aw kon asa nila iagi ang mga heavy equipment nga gamiton sa pagpatuman sa ground zero sa pito ka Sitio sa Duljo-Fatima nga naigo sa sunog.
Tumong sa DWUP nga masugdan ang pagpatuman sa ground zero sa Sitio Buli, Mansinitas, Catwalk, San Pedro, Plastikan, Pasong Kabayo ug Punyang sa adlaw’ng Huwebes.
Si Alcoseba nagkanayon nga susihon nila og balik ang mga lugar tungod kay adunay nibalik nga nagtaod og trapal ug sa pagpatuman sa ground zero kinahanglang walay tawo ang lugar. Samtang kadtong mga naigo sa sunog niadtong Sabado makig-meeting pa ang DWUP sa Huspicio de San Jose nga maoy tag-iya sa yuta nga giabangan sa mga biktima sa sunog.
“Naa among technical team didto nag-boundary survey sa affected gyud nga area para tan-awon namo, mo-propose mi og design sa re-block kay murag renter man diay na sila sa Huspicio de San Jose, tan-awon nato”, dugang ni Alcoseba. (BANAT NEWS)
- Latest
