CIDG-7 pasakaan og kaso
CEBU, Philippines — Kompanya sa pasugalan mopasaka og kaso batok sa Criminal Investigation and Detection Group-7 (CIDG-7) tungod sa matud pa ilegal nga pagronda kanila bisan pa og legal ang ilang operasyon.
Kasong robbery ug unlawful arrest ang ipasaka batok sa hepe sa CIDG-7 nga si Supt. Lito Patay uban sa tulo niya ka mga operatiba.
Ang mga polis gipasanginlang mibulsa sab sa ubang halin sa maong sugalan.
Kahinumduman nga 35 ka mga bettor ug upat ka mga kahera sa maong offsite cockfighting ang gidakop sa Barangay Simala, Lungsod sa Sibonga niadtong Disyembre 15 sa pasangil nga illegal kini sanglit usa kini ka online gambling.
Apan ang abogado sa mga akusado nga si Atty. Julius Ceasar Entise nitug-an sa Banat News nga gibasura ang kaso sa 35 ka namusta gumikan sa kahuyang sa ebidensya sa CIDG.
Samtang ang upat ka mga kahera nakapiyansa na sa maong kaso.
Butyag sa maong abogado sa gihimong imbentaryo sa CIDG-7 gideklarar nga P3,300 ra ang nasakmit gikan sa upat ka mga kahera.
"They declared only P3,300 recovered but little did they know that pictures were taken. There were several P1,000 and P500 bills from each cashiers how come mao ra na ilang gi-declare? There were also coins, nganong exact P3,300 ra gyud? Kana pa lang daan naa nay discrepancy," matud ni Entise.
Gibanabana nilang P70 mil ngadto sa P80 mil ang halin sa upat ka mga kahera.
Gipasabot usab niya nga dili online gambling kondili offsite cockfight betting ang maong sugalan. Gibase sa live broadcast ang nahitabong sabong diha gihapon gihimo sa maong lungsod.
Matud niya may pagtugot kini sa Office of the Sangguniang Bayan ug aduna usab silay ikapakita nga business permit nga pinirmahan pa sa mayor sa Sibonga nga si Caroline Bacaltos.
"Cockfighting is regulated by the LGU (Local Government Unit) not the PAGCOR (Philippine Amusement and Gaming Corporation)," dugang sa maong abogado.
Apan si Patay mibarog nga ilegal ang maong operasyon ug lig-on ang ilang gihuptang ebidensya nga usa kadto ka online gambling.
Masaligon sab siya nga wala masayop ug wala mangawat og kwarta ang iyang mga operatiba. Matud niya di sila magpaapektar kun sila makasohan. (BANAT NEWS)
- Latest
