Sinulog 2019 seguruong malinawon

CEBU, Philippines — Makig-tambayayong ang Sinulog Festival Inc. sa nagkalain-laing buhatan sa Cebu City Governemnt aron maseguro nga hapsay ug malinawon ang pagsaulog sa Sinulog sunod tuig.

Lakip sa mga buhatan nga gisangpit sa Sinulog Festival Inc. naglakip sa Division for the Welfare of the Urban Poor (DWUP), Cebu City Transportation Office (CCTO), Cebu City Disaster Risk Reduction Management Office (CCDRRMO), Department of Public Services (DPS) ug Prevention Restoration, Order, Beautification and Enhancement (PROBE) team.

Si SFI Executive Committee Chairman Konsehal Dave Tumulak miingon ang matag buhatan dunay nagkadaiyang papel alang sa luwas ug malampuson unya nga pagsaulog sa Sinulog.

Ang DWUP nga maoy in-charge sa mga manindahay, ang CCTO alang sa pagpahapsay sa trapiko, ang CCDRRMO maoy mudala sa safety ug disaster preparedness, samtang ang DPS ang gitahasan sa kalimpyo sa palibot ug ang PROBE maoy muhawan sa mga mag-ali sa kadalanan.

Gusto ni Tumulak nga magamit ang tanang street cleaners aron pagsiguro nga kada human sa kalihukan magpabiling limpyo ang kadalanan sa siyudad.

Ang Officer-in-charge sa DPS John Paul Gelasque dili una makahatag og insaktong ihap sa mga street cleaners nga ipakatap kay iyaha pa kining i-finalize.

Kini miasoy nga makig-alayon sila sa Barangay Loaders aron tabangan sila sa clean up operations.

Sa laing bahin, nagsugod na ang SFI sa pagbutang og grand stage alang sa Sinulog Grand Parade diha sa Cebu City Sports Center (CCSC).

Niadtong December 24, ang mga tawo sa Dakay Construction nagsugod og assemble sa stage sa tunga-tungang bahin sa CCSC kun diin ang mga contingents mo-perform.

“Preparasyon nana kanang atong gihimo karon, para sad atong mga contingents pwede sad sila maka-practice na para inig abot na gyud sa Sinulog Grand Parade makita na gyud nila ug mahan-ay nila pag-ayo ang ilang choreography”, matud pa ni Tumulak.

Gilauman nga ang Dakay Construction mahuman sa pagbutang sa stage karong Biyernes ug nunot niini ang mga contigents makasugod na unya og gamit sa stage alang sa practice.

Dugang ni Tumulak nga nag-finalize na sab sila sa production aspect sa Sinulog Festival hinoon ang contingents, puppeteers ug uban nga apil sa sinulog dunay final meeting karong January 10.

Ang Sinulog Festival usa sa grandiosong kalihukan sa nasud nga mahitabo sa ikatulong Dominggo sa buwan sa Enero kada tuig sa Cebu City isip pagpahinungod sa balaang bata Sr. Sto. Niño.— /LPM (BANATNEWS)