Tomas ni-react sa pagkwestiyon ni Rama

CEBU, Philippines — Giklaro ni Cebu City Mayor Tomas Osmeña nga dili kini ang unang higayon nga mopasaka og kaso labot sa giingong ilegal nga disbursement sa P800 milyones nga hinabang sa mga kabarangayan sa siyudad.

Sa press conference kagahapon, si Osmeña nagkanayon nga si kanhi Mayor Michael Rama dili angay mokwestiyon sa timing sa administrative ug criminal charges nga giatubang niini sa anti-graft office.

“We have filed cases against several barangays some 60 barangays and some 30 plus, we file for notice of for request for preventive suspension”, matud ni Osmeña.

Matud ni Osmeña nga ang administrasyon ni Rama nipagawas sa P800 milyones nga pundo nga giingong walay approval sa city council diin sukwahi kini sa balaod ug budget ordinance nga nag-cover sa P13.4 billion Annual Budget sa 2015.

Si Osmeña nipasaka og kasong graft and corruption, grave misconduct prejudicial to the best interest of the service ug conduct unbecoming of a government official batok kang Rama diha sa Office of the Ombudsman-Visayas. Kini kalabot sa pagpasar sa Annual Budget Ordinance nga P13.4 bilyones sa city council diin nakalatid sa budget ordinance ang special provision nga ang pagtando sa legislative body gikinahanglan sa dili pa ang P800 milyones nga hinabang alang sa kabarangayan i-release.

Si Rama kinsa maoy mayor niadtong higayona niisyu sa iyang partial veto sa maong provision apan ang Commission on Audit (COA) wala motugot sa pagpagawas sa pundo gumikan sa kakuwang sa approval sa council.

Gihulagway ni Rama nga usa ka political harassment ang gihimo ni Osmeña ug gikwestiyon niini ang pagpasaka og kaso diin pwede unta nga buhaton niadtong tuig 2016 ug 2017.

Sayo pa, gihimakak ni Rama ang pasangil batok kaniya. (/BDB)(BANATNEWS)